Зианы дӕр ӕнӕ фӕхудгӕ нӕй…

0
18

Ирон хъарӕггӕнӕг устыты рахонӕн уыдис ӕцӕг поэттӕ, уымӕн ӕмӕ сӕ ныхӕстӕ зӕрдӕйы иннӕрдӕм хызтысты. Аивадон ӕгъдауӕй афтӕ фӕлгонцджын уыдысты, ӕмӕ сӕм ӕнӕфӕкӕугӕ ничи лӕууыди. Фӕлӕ-иу худӕджы уавӕры дӕр бахаудысты. Ӕз уын дзы ӕрхӕсдзынӕн дыууӕ ахӕм цауы. Ручъы ма куы цардтӕн, уӕд нӕм иу диссаджы ус цардис — Дзадтиаты Беллӕ. Уӕллаг Ручъы Къозонты Мишӕйы бинойнаг уыдис. Хорз хъарӕггӕнаг ус ӕй хуыдтой.

Ирон ӕгъдаумӕ гӕсгӕ-иу зианы рӕстӕджы мӕрддзыгой адӕмы разӕй цыдис хъарӕггӕнгӕ. Беллӕ уыдис тынг мӕлгъӕвзаг ӕмӕ хъӕлӕсджын сылгоймаг. Зианджыны хӕдзармӕ-иу куы фӕцӕйхӕццӕ кодтой, уӕд-иу ныхъхъарӕг кодта, ӕмӕ-иу иннӕтӕ дӕр ӕмхуызонӕй ныккуыдтой. Зианы уӕлхъус-иу рабадт, ӕмӕ алы ног бацӕуӕджы рӕстӕджы дӕр ныхъхъарӕг кодта, ӕмӕ та-иу адӕм ныккуыдтой, нӕлгоймӕгтӕ дӕр-иу хӕкъуырццӕй куыдтой.

Йӕ ном хъуыстгонд уыдис канд Рукъгомы нӕ, фӕлӕ ӕнӕхъӕн облӕсты дӕр. Суанг ма фыццаг секретармӕ дӕр бахӕццӕ. Фӕхуыдтой йӕ обкоммӕ. Бацин ыл кодтой, йӕ царды хабӕрттӕй йӕ афӕрстытӕ кодтой, ӕмӕ йын ӕй бамбарын кодтой, цӕй тыххӕй йӕм фӕдзырдтой, уый. Диссаджы хъарджытӕ, дам, зоныс, ӕмӕ, дам, сӕ хъуамӕ ныффыссӕм, цӕмӕй ӕмбисондӕн баззайой.

Беллӕ исдугмӕ ницы сдзырдта, стӕй сын афтӕ зӕгъы: «Мӕ разы мын мард ӕрӕвӕрут. Ӕнӕ уымӕй куыд хъуамӕ рахъарӕг кӕнон?». Сӕхирдӕм дӕр сын цыдӕртӕ загъта, ӕмӕ худынырдӕм фесты.

Дзадтиатӕй иу лӕг Пъауле хуынди, Сыбырмӕ хаст уыдис ӕмӕ ӕрыздӕхт уырыссаг усимӕ. Пъауле куы амард, уӕд зианы уӕлхъус Беллӕйы хуызӕн хъарӕггӕнаг ус бадт ӕмӕ зӕрдӕриссӕн хъарджытӕ кодта, иу тӕригъӕддаг мард дӕр нӕ ферох кодта. Адӕмӕн фыркуыдӕй сӕ цӕстытӕ ныссырх сты. Адӕм куыд цыдысты, афтӕ сӕ ус тынгдӕр кӕуын кодта. Пъаулейы усӕн, ӕвӕццӕгӕн, йӕ бон хъусын нал уыд (сыбираг кӕд фехъуыста, ахӕм хъарджытӕ, ӕмбаргӕ дӕр сӕ нӕ кодта). Йӕ бынатӕй фӕгӕпп кодта, бауад хъарӕггӕнӕг усмӕ, йӕ цонгыл ын фӕхӕцыд ӕмӕ йӕ феддӕдуар кодта, уырыссагау хъӕргӕнгӕ: «Куыннӕуал дӕ фенон, афтӕ! Иннӕты дӕр ма амидин кӕныс!». Адӕм хорзау нал фесты, стӕй се ‘муд ӕрцыдысты ӕмӕ худын райдыдтой.

Уыдоны ӕрцыдмӕ дзӕбӕхӕй, ӕнӕнизӕй фӕцӕрут!

Плиты Ленӕ, пенсиисӕг

ОСТАВЬТЕ ОТВЕТ

Please enter your comment!
Please enter your name here