Ахуырады къабаз, ахуыргӕнӕджы кад — ноджы бӕрзонддӕр къӕпхӕнмӕ

0
21

Знон Цӕгат Ирыстонмӕ кусӕг балцы ссыд Уӕрӕсейы Федерацийы рухсады министр Сергей КРАВЦОВ. Йемӕ сты Наукӕ ӕмӕ ахуырады къабазмӕ цӕстдарды федералон службӕйы разамонӕджы хӕстӕ рӕстӕгмӕ ӕххӕстгӕнӕг Анзор МУЗАЕВ, Уӕрӕсейы Федерацийы Рухсады министрады ӕмӕ ахуырады къабазы минӕвӕрттӕ.

Дзӕуджыхъӕуы бынӕттон администрацийы ӕмбырдтӕ аразӕн залы федералон министр фембӕлд республикӕйы ахуырады къабазы кусджытимӕ. Уыцы фембӕлды архайдтой республикӕйы Сӕргълӕууӕг Битарты Вячеслав, Парламенты Сӕрдар Алексей Мачнев, депутаттӕ, хицаудзинад ӕххӕстгӕнӕг оргӕнты минӕвӕрттӕ. Ныхас дзы цыд «РЦИ-Аланийы ахуырады системӕйы райрӕзты» фарстытыл.

Ӕмбырд амыдта республикӕйы ахуырад ӕмӕ наукӕйы министр Людмилӕ Башарина. Фыццаг дзы раныхас кодта Битарты Вячеслав:

— Арфӕ кӕнын ӕмбырды ӕппӕт архайджытӕн дӕр, уӕлдай арфӕ та нӕ уазджытӕн, сӕрмагондӕй — Уӕрӕсейы Федерацийы рухсады министр Сергей Кравцовӕн йӕ ног куысты бынаты фӕдыл. Ахуырады къабаз республикӕйы ноджы бӕрзонддӕр къӕпхӕнмӕ сисыны тыххӕй нӕм арӕзт цӕуынц ахуырады ног объекттӕ — скъолатӕ, рӕвдауӕндӕттӕ. Уыцы хъуыддаджы нын стыр ӕххуыс кӕны федералон министрад. Фӕлӕ сӕйраг у, чи дзы кусдзӕн, уыцы ахуыргӕнджыты цӕттӕ кӕныны фарст ӕмӕ сӕ дӕсныдзинад. Цӕмӕй уыдон сӕ куыстӕй ӕмӕ сӕ гӕнӕнтӕй разы уой, уый тыххӕй ахуырады къабазы рӕзтӕн уавӕртӕ аразын та у мах хӕс, ӕмӕ йӕ ӕххӕст кӕндзыстӕм.

Сергей Кравцов йӕ раныхасы куыд загъта, афтӕмӕй разы у, ахуырады къабазы фарстытӕм, йӕ райрӕзты нысантӕм республикӕйы ахӕм стыр ӕргом здӕхт кӕй цӕуы, уый тыххӕй.

— Алчидӕр нӕ тынг хорз ӕмбары, ахуырады хӕрзхъӕддзинадӕй, ахуыргонд фӕлтӕрӕй аразгӕ кӕй у республикӕйы, стӕй ӕппӕт бӕстӕйы фидӕн дӕр. Уымӕ гӕсгӕ ахуырады, рухсады фарстытӕ алкӕддӕр сты ӕмӕ уыдзысты фыццаградон. Ацы ӕмбырды размӕ уал фембӕлдыстӕм Битарты Вячеславимӕ, республикӕйы разамындимӕ ӕмӕ ныхас кодтам республикӕйы ахуырады къабазы ахсджиагдӕр нысантыл ӕмӕ сӕ ӕххӕст кӕныны мадзӕлттыл. Мӕ бон зӕгъын у, федералон министрады ‘рдыгӕй уыдзӕн ӕппӕтвӕрсыг ӕххуыс, цӕмӕй уыдон сӕххӕст кӕнын къухы бафта, уымӕн. Дарддӕр дӕр арӕзт цӕудзысты ног скъолатӕ, уыдзӕн организацион ӕмӕ методикон ӕххуыс, лыггонд цӕудзысты ахуырады къабазы кусджыты социалон фарстытӕ, нывылдӕр уыдзӕн сӕ материалон уавӕр. Хицӕн ныхасы аккаг у ахуыргӕнӕджы кад бӕрзонд сисыны фарст, ӕмӕ ууыл дӕр иумӕйагӕй кусдзыстӕм.

Сергей Кравцов куыд загъта, афтӕмӕй федералон министрадӕн ис иудадзыг бастдзинад республикӕйы скъолаты директортимӕ ӕмӕ муниципалон оргӕнты разамонджытимӕ. Йӕ ныхасмӕ гӕсгӕ, уӕлдай стырдӕр ӕргом здӕхт цӕудзӕн, се ‘нӕниздзинады авналӕнтӕ цыбыр кӕмӕн сты, стӕй, ахуыры чи не ‘ййафы, уыцы сывӕллӕттӕн ахуырӕн ӕмӕ фӕлварӕнтӕ дӕттынӕн сӕрмагонд уавӕртӕ аразынмӕ, курдиатджын сывӕллӕттӕн хицӕн фадӕттӕ аразынмӕ, ныййарджытимӕ кусынмӕ. Стӕй ма, министр куыд бафиппайдта, афтӕмӕй хицӕн ныхасы аккаг у астӕуккаг-профессионалон ахуырад.

— Уымӕн дӕр цӕттӕ кӕндзыстӕм программӕтӕ, уымӕн ӕмӕ йӕ ӕмбарӕм, ӕнӕ дӕсны кусджытӕй экономикӕ кӕй нӕ рӕзы, уый.

Ӕмбырды фӕстӕ Битарты Вячеслав, Сергей Кравцов ӕмӕ Анзор Музаев дзуаппытӕ радтой журналистты фарстытӕн.

Уый фӕстӕ Битарты Вячеслав ӕмӕ мӕскуыйаг уазджытӕ бабӕрӕг кодтой, 1100 скъоладзауӕн бынат кӕм уыдзӕн, уыцы ног скъолайы арӕзтад Дзӕуджыхъӕуккаг уынджы.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here