Цалынмӕ цӕрӕм…

0
57

Цӕгат Ирыстоны зындгонд публицист, поэт, УФ-йы сгуыхт ахуыргӕнӕг, Советон Цӕдисы паддзахадон премийы лауреат, УФ-йы Журналистты цӕдисы уӕнг Биазырты Валентинӕйӕн ӕрӕджы рацыд ӕмдзӕвгӕты ӕмбырдгонд «Бузныг уын, цӕргӕ чи кӕны, уыдоны номӕй». Уый у йе ‘мдзӕвгӕты фӕндзӕм ӕмбырдгонд, ӕдӕппӕтӕй та рауагъта ссӕдз чиныджы.

Ӕрбахӕстӕг кӕны не Стыр Уӕлахизы 75 азы бон, ӕмӕ та чиныг ногӕй нӕ зӕрдыл ӕрлӕууын кӕндзӕн, цас хъизӕмӕрттӕ бавзӕрстой нӕ адӕм, цас туг ныккалдтой, цӕмӕй уыцы Уӕлахиз ӕрбахӕстӕг кодтаиккам. Нӕ, уый зӕрдыл ӕрлӕууын кӕнын дӕр нӕ хъӕуы, уый ӕдзухдӕр нӕ зӕрдӕты ис, ӕмӕ, Уӕлахизы бонӕй цас дарддӕр цӕуӕм, уыйас нӕм хӕстӕгдӕр кӕны, нӕй йын ферохгӕнӕн.

Чиныг фыст у йӕ ныййарджыты — хӕсты архайджыты ӕмӕ Фыдыбӕстӕйы Стыр хӕсты ӕппӕт архайджыты ном арынӕн.

Чиныджы разныхасы, «Цалынмӕ цӕрӕм», зӕгъгӕ, уым автор фыссы: «Мӕ хъуыдымӕ гӕсгӕ, мӕ фӕлтӕры алы адӕймагӕн дӕр уыдис йӕхи хӕст. Нӕ, мах ӕй нӕ хъуыды кӕнӕм. Нӕ хистӕртӕ цы хъизӕмӕрттӕ бавзӕрстой, уыдон мах нӕ бавзӕрстам. Мах нӕхӕдӕг хӕсты нӕ хӕцыдыстӕм: мах бӕсты дӕр уыцы уӕззау уаргъ нӕ ныййарджыты уӕхсчытыл ӕрӕнцад. Фӕлӕ уӕддӕр нӕ царды дӕр уыцы ӕвирхъау хӕст уыди. Уыдис ӕмӕ ныл йӕ арф фӕд ныууагъта цӕрӕнбонтӕм.

Хӕсты фӕстӕйы фыццаг сӕрд. Поездтӕ сӕ тӕккӕ дзаг уыдысты, хӕстӕй фӕстӕмӕ чи здӕхт сӕ райгуырӕн бынӕттӕм, уыцы салдӕттӕй. Уым бадтысты, хъысмӕт стыр амонд кӕмӕн балӕвар кодта, уыцы тугуарӕнӕй раирвӕзын ӕмӕ Уӕлахизыл сӕмбӕлыны амонд, уыцы салдӕттӕ. Перронтыл сӕм ӕнхъӕлмӕ кастысты адӕм, уыдонимӕ — мингай сылгоймӕгтӕ ӕмӕ сывӕллӕттӕ. Уыдон ӕнхъӕлмӕ кастысты, сӕ хиуӕттӕ, къабӕзтӕ кӕй сыздӕхдзысты, уый ныфсӕй. Фӕлӕ дзы бирӕтӕ фыдӕнхъӕл фесты… Фӕлӕ уӕддӕр… Ногӕй та фӕстӕмӕ ардӕм ӕрбацӕудзысты, ӕнхъӕлмӕ кӕсдзысты, уымӕн ӕмӕ ныфc фӕстагмӕ амӕлы. Ӕппӕт уыдӕттӕ ӕз зонын мӕ мады ныхӕстӕй. Нырма йӕхӕдӕг ӕвзонг, зноны полчъы бастдзинаддарӕг сылгоймаг, йе ‘фсӕддон уӕлӕдарӕс дӕр нӕма раласта, афтӕмӕй мӕ, дзидзидай сывӕллоны, йӕ сӕрыхицауы райгуырӕн Ирыстонӕй ласта Белоруссимӕ, сыгъд ӕмӕ дӕрӕнгонд Могилевмӕ йӕ мадмӕ — нӕ йӕ федта ӕнӕхъӕн хӕсты азты. Сӕ райгуырӕн хӕдзӕрттӕ, сӕ сывӕллӕтты чи ӕрымысыд, уыдон-иу мӕ сӕ къухты систой, рӕвдыдтой мӕ. Поезд-иу рӕстӕгӕй-рӕстӕгмӕ куы ‘рлӕууыд, уӕд-иу разгъордтой, ӕхсыр-иу балхӕдтой ӕхсыруӕйгӕнӕг сылгоймӕгтӕй, сӕкӕры къӕрттытӕ — фӕндыдис сӕ мӕ мадӕн истӕмӕй баххуыс кӕнын.

Мӕ мад мӕ Могилевмӕ ныххӕццӕ кодта. Горӕтӕн базонӕн нал уыд. Иу ран фырфӕлладӕй ӕрбадт йӕ чумӕданыл. Чидӕр ӕй федта, аххуыс ын кодта сыстынӕн, чидӕр та мӕ мадымадмӕ хӕрзӕггурӕггаг фӕци. Ӕмӕ мӕнӕ тындзы йӕ чызджы ӕмӕ йӕ чызджы чызджы размӕ, нырма йӕ фыццаг хатт фендзӕн. Мӕ фыд ма уӕддӕр, хӕсты фӕстӕ, службӕ кодта ӕфсады. Службӕ кодта афицер-танкист бирӕ азты. Ӕмӕ уый ӕрмӕст йӕхи нӕ хъуыд, фӕлӕ нӕ бӕстӕйы дӕр, цӕмӕй нӕ Уӕлахиз ноджы фидардӕр уа. Уый та уыд зноны хӕстонты бон…»

Ӕмӕ дарддӕр: «ӕрӕджы ӕз иу чиныджы бакастӕн, ӕмӕ мын мӕ зӕрдӕ нызмӕлын кодта. Удӕгӕстӕ ацӕудзысты, фӕлӕ, чи амард, уыдон баззайдзысты. 144 полчъы хуыссынц Чехословакийы зӕххыл — 144 мин ӕвзӕрст хӕстоны — нацийы сӕрыстырдзинад. 640 полчъы хъӕбатыр хӕстонтӕ се ‘нусон бынат ссардтой Польшӕйы зӕххыл — 640 мин хӕстоны сӕ тӕккӕ хъаруйыл. Сӕдӕ полкъӕн зӕхх бӕмбӕгӕй фӕлмӕндӕр сси Венгрийы зӕххыл — сӕдӕ мин хӕстоны нал сыздӕхтысты Уӕрӕсемӕ. 500 полчъы ӕнустӕм бамбӕрзта немыцы зӕхх — 500 мин хӕстоны нал сыздӕхдзысты сӕ ныййарджытӕм, бинойнӕгтӕм, сывӕллӕттӕм. Ахӕм уыдис уыцы ӕвирхъау хӕст. Не Стыр Уӕлахиз нӕ къухы ӕнцонӕй нӕ бафтыд.

Советон адӕмы хъайтарон Уӕлахиз. «Бӕрӕгбон цӕссыгдзӕстытимӕ…”. Тугӕй ӕлхӕд сабыр цард… Цас адӕмӕн ахуыссыд сӕ зынг, цас хъизӕмӕрттӕ бавзӕрстой адӕм, цас диссаджы сгуыхтдзинӕдтӕ равдыстой… О, уыдон иууылдӕр уыдысты, ӕмӕ никуы ферох уыдзысты».

Уый тыххӕй фыст у ацы чиныг.

Абайты Эдуард

ОСТАВЬТЕ ОТВЕТ

Please enter your comment!
Please enter your name here