«Баллада о солдате» — иронау

0
21

21 февралы Дзӕуджыхъӕуы Кинойы хӕдзары уыдзӕн зындгонд советон киноныв «Баллада о солдате»-йы премьерӕ ирон ӕвзагыл. Уый тыххӕй фехъусын кодта РЦИ-Аланийы Мыхуыр ӕмӕ дзыллон коммуникациты хъуыддӕгты фӕдыл комитеты пресс-службӕ.

Зындгонд куыд у, афтӕмӕй ацы кинонывы ӕвдыст цӕуынц Фыдыбӕстӕйы Стыр хӕсты рӕстӕджы цаутӕ. Курдиатджын режиссер Григорий Чухрай ацы киноныв систа 1959 азы.

Кинонывы сӕйраг хъайтар — 19-аздзыд салдат Алешӕ Скворцов хӕсты быдыры равдыста сӕрӕндзинад ӕмӕ сармадзанӕй знаджы цалдӕр танчы фехӕлдта. Уыцы хъӕбатырдзинады тыххӕй йын командӕгӕнынад радта цыбыр отпуск. Уыйадыл лӕппу атагъд кодта йӕ райгуырӕн хъӕумӕ, йӕ мады фенынмӕ… Кинонывы архайды фылдӕр хай ӕвдисы, хӕдзармӕ фӕндагыл Алешӕйыл цы цаутӕ ӕрцыд, уыдон. Ӕрмӕстдӕр кинонывы кӕронбӕттӕны сӕмбӕлд советон салдат йӕ ныййарӕгыл. Алешӕ йӕ мады ӕрбахъӕбыс кодта ӕмӕ йын зӕрдӕ бавӕрдта, хӕсты быдырӕй сӕрӕгасӕй кӕй сыздӕхдзӕн, уымӕй. Фӕлӕ йӕ хъысмӕт зӕрдӕзӕгъгӕ нӕ рауад — йӕ уд нывондӕн ӕрхаста фидӕны фӕлтӕрты сабыр царды сӕраппонд…

Григорий Чухрай фӕстӕдӕр йӕ интервьютӕй иуы загъта: «Бафӕндыд мӕ, не ‘хсӕнӕй ӕрмӕстдӕр иу адӕймаг куы фӕхъӕуа, уӕддӕр, дуне цӕхгӕр кӕй фӕивы, уый тыххӕй киноныв сисын».

«Баллада о солдате» раджы сси дунеон кинематографы «сыгъзӕрин фонд»-ы иу хай, кинонывӕн алыхуызон фестивалты саккаг кодтой 100 хӕрзиуӕгӕй фылдӕр (советон кинонывтӕй уый бӕрц призтӕ никӕцы райста). Фарон райдыдта куыст киноныв ирон ӕвзагмӕ раивыныл. Ӕмӕ ныр студи «44-я долгота»-йы сфӕлдыстадон къорды архайды фӕрцы «Баллада о солдате»-йы хъайтартӕ иронау сдзырдтой.

Уӕлдӕр куыд загътам, афтӕмӕй киноныв равдисдзысты 21 февралы. Райдайӕн — 15 сахатыл.

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here