Финансон цӕстдарды мадзӕлттӕ, туризм райрӕзын кӕныны ӕмӕ ӕндӕр фарстытӕ

0
22

Знон уыд РЦИ-Аланийы Хицауады радон ӕмбырд. Амыдта йӕ  Сӕрдар ТУСКЪАТЫ Таймураз.

Хицауады уӕнгтӕ ӕрдзырдтой ӕмӕ сфидар кодтой республикӕйы социалон-экономикон ӕмӕ ӕхсӕнадон-политикон цардимӕ баст  уынаффӕты проекттӕ ӕмӕ сӕм бахастой хъӕугӕ уӕлӕфтуантӕ ӕмӕ ивддзинӕдтӕ.

«Хуыздӕр муниципалон службӕгӕнӕг». Ацы  ӕрвылазон  республикон конкурсмӕ ивддзинӕдтӕ хаст кӕй ӕрцыд, уый фӕдыл раныхас кодта республикӕйы Сӕргълӕууӕджы ӕмӕ Хицауады Администрацийы разамонӕг Челӕхсаты Рустем. Ныры онг «Хуыздӕр муниципалон службӕгӕнӕджы» ном лӕвӕрдтой ӕхсӕз номинацимӕ гӕсгӕ. Ныртӕккӕ та цыппар йеддӕмӕ нал сты ӕмӕ баст сты горӕты фӕлгонцадимӕ, йӕ цӕрджытӕн  ӕнцонвадат уавӕртӕ аразынимӕ, цӕрӕнуӕтты-коммуналон хӕдзарады къабаз нывыл кӕнынимӕ ӕмӕ ӕндӕр нысантимӕ. Йӕ хорз куыстӕй цыппар номинацийӕн дӕр дзуапп чи дӕтта, уыцы бӕрнон адӕймаг уыдзӕн ацы кадджын номы аккаг.

РЦИ-Аланийы хъалонты хӕрдзтӕн аргъ скӕныны ӕмӕ  хъалонты хӕрдзты номхыгъд аразынӕн уагӕвӕрдтӕ сфидар кӕныны, стӕй республикӕйы паддзахадон хӕс фӕкъаддӕр кӕнынӕн уӕлӕмхасӕн фӕрӕзтӕй спайда кӕныны тыххӕй РЦИ-Аланийы Хицауады уынаффӕты проектты фӕдыл раныхас кодта финансты министр Бутаты Хъасболат. Уынаффӕты проекттӕн сӕ нысан у хъалонты хӕрдзтӕн аргъ скӕнын, Уӕрӕсейы Федерацийы закъонӕвӕрынады домӕнтӕн дзуапп куыд дӕттой, афтӕ. Хицауады Сӕрдар Тускъаты Таймураз куыд бафиппайдта, афтӕмӕй уый у хъалонты  политикӕ, уымӕн ӕмӕ республикӕйы паддзахадон хӕс азӕй-азмӕ кӕны къаддӕр. Уынаффӕты проекттӕ фидаргонд куы ӕрцӕуой, уӕд ма сӕ фӕрцы уыцы хӕс 800 милуан сомӕй ноджыдӕр  фӕкъаддӕр уыдзӕн.

РЦИ-Аланийы цӕрджыты сӕйраг социалон-демографион къордтӕм гӕсгӕ фӕцӕрынӕн чи хъӕуы, уыцы ӕппынкъаддӕр бӕрц 2019 азы цыппӕрӕм кварталӕн сфидар кӕныны фӕдыл раныхас кодта фӕллой ӕмӕ социалон рӕзты министр Хуыбаты Барис. Уынаффӕйы проекты куыд загъд ис, афтӕмӕй уыцы бӕрц нымад ӕрцыд ӕмбӕлгӕ закъонӕвӕрынадмӕ гӕсгӕ, стӕй, афӕдзы афонмӕ гӕсгӕ цавӕрдӕр продукттӕ кӕй фӕасламдӕр вӕййынц, уый хынцгӕйӕ. Афӕдзы афонмӕ гӕсгӕ иуӕй-иу продуктты аргъ 2 процентӕй кӕй фӕкъаддӕр, уымӕ гӕсгӕ, фӕцӕрынӕн чи хъӕуы, уыцы ӕппынкъаддӕр бӕрц рауад 9 мины ӕмӕ 231 сомы. Афтӕмӕй, фӕцӕрынӕн чи хъӕуы, уыцы ӕппынкъаддӕр бӕрц рауад афтӕ: куыстхъом адӕймӕгтӕн — 9 мины ӕмӕ 794 сомы, пенсиисджытӕн — 7 мины ӕмӕ 368 сомы, сывӕллӕттӕн — 9 мины ӕмӕ 371 сомы.

«Ахуырады райрӕзт»-ы Уӕрӕсейы Федерацийы паддзахадон программӕйы нысантӕ ӕххӕст кӕнынимӕ баст у, республикӕйы ахуырад ӕмӕ наукӕйы министр Людмилӕ Башарина цы уынаффӕйы проекты фӕдыл раныхас кодта, уый. Ныхас цӕуы, хъӕутӕм, кусӕг поселоктӕм ӕмӕ, йӕ цӕрджыты нымӕц 50 мин адӕймагӕй фылдӕр кӕмӕн нӕу, ахӕм гыццыл горӕттӕм ахуыргӕнӕгӕй кусынмӕ чи ацыд, уыдонӕн федералон ӕмӕ республикон бюджеттӕй компенсацион ӕххуысы мадзӕлттыл. Министры ныхасмӕ гӕсгӕ, хъӕугӕ хӕрдзтӕ рагацау ӕвӕрд ӕрцыдысты бюджеты. Ныхас цы цӕрӕн бынӕттыл цӕуы, уым ахуыргӕнджытӕн ис куысты бынӕттӕ, уӕдӕ ахӕм ран кусын кӕй фӕнды, ахӕмтӕ дӕр ис. Ныртӕккӕ уал горӕты бынӕттон хиуынаффӕйады администрацийы ис 25 куырдиаты, сӕ бадӕттыны ӕмгъуыд у 1 апрелмӕ. Программӕ аххӕсдзӕн ӕртӕ азы. Тускъаты Таймураз куыд бафиппайдта, афтӕмӕй хъӕууон скъолаты кусӕг ахуыргӕнджытӕн уый у ахсджиаг материалон ӕххуыс.

Туризм Цӕгат Ирыстоны райрӕзын кӕныны тыххӕй Хицауады уынаффӕйы проекты фӕдыл раныхас кодта Туризмы комитеты сӕрдар Хъодзаты Зауырбег. Закъоны проекты ныхас цӕуы, бӕлццӕттӕн лӕггады объекттӕ фӕндӕгты алыварс аразыны фӕнд чи скӕна, чысыл ӕмӕ рӕстӕмбис амалхъомады уыцы субъекттӕн субсидитӕ дӕттыны уагӕвӕрд сфидар кӕныныл. Хъодзайы-фырт куыд загъта, афтӕмӕй комитет сбӕлвырд кодта сӕйраг туристон маршруттӕ, ӕмӕ уым арӕзт ӕрцӕудзӕн нырма уал дӕс ахӕм объекты. Чи сӕ араза, чысыл ӕмӕ рӕстӕмбис амалхъомады уыцы субъекттӕн субсидийы хуызы лӕвӕрд ӕрцӕудзӕн 750 мин сомы алкӕмӕн дӕр. Ацы куысты Хицауады Сӕрдар ахсджиагыл банымадта комитеты ӕмӕ районты бынӕттон хиуынаффӕйады администрациты ӕмгуыстад.

Хицауады ӕмбырдӕн хатдзӕгтӕ кӕнгӕйӕ ма Тускъаты Таймураз  ӕрдзырдта финансон цӕстдарды мадзӕлттӕ фӕкарздӕр кӕныныл, стӕй алы министрад ӕмӕ алы ведомствӕйы куыст ноджы бӕлвырддӕр ӕвзарыны мадзӕлттыл. «Ахӕм цӕстӕнгас уӕлдай ахсджиагдӕр у ныртӕккӕ, национ проекттӕ ӕххӕст кӕныны рӕстӕг», — загъта Хицауады Сӕрдар.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here