Цæмæй экономикон уавæр ма фæкъуыхцы уа…

0
52

Коронавирусы инфекци уæрæхдæр кæй кæны, уыцы æууæл хынцгæйæ, цы уæлæмхасæн мадзæлттæ саразын хъæуы, цæмæй республикæйы экономикон уавæр ма фæкъуыхцы уа? Ацы æмæ æндæр ахсджиаг фарстытыл ныхас цыд, РЦИ-Аланийы Сæргълæууæг БИТАРТЫ Вячеславы Указæй цы сæрмагонд оперативон штаб арæзт æрцыд, уый уæнгты фыццаг æмбырды.

Битарты Вячеслав сæрдариуæг кæм кодта, уыцы æмбырды архайдтой Хицауады Сæрдар Тускъаты Таймураз, профилон министртæ, Парламенты депутаттæ æмæ амалхъомады къабазы минæвæрттæ. Сæвзæргæ эпидемиологон уавæр зæрдыл даргæйæ, штабы уæнгты иу хай ныхасы архайдта видеоконференцийы фæрцы.

Фембæлд гом кæнгæйæ, Цæгат Ирыстоны Сæргълæууæг куыд фæнысан кодта, афтæмæй æппæт куыстуæтты разамонджытæ дæр хъуамæ батыхсой сæ коллективты уæнгтыл. Сæ архайд сæрмагонд уагæвæрдмæ гæсгæ чи адарддæр кодта, уыцы куыстуæтты уæлдай бæстондæр æххæст кæнын хъæуы æппæт санитарон-эпидемиологон домæнтæ дæр, цæмæй кусæг адæм гæнæн æмæ амалæй хъахъхъæд æрцæуой хæцгæнизæй.

— Уымæй уæлдай, ныртæккæ бæстон æркæсын хъæуы, экономикæйы къабæзты архайды цы къуыхцытæ фæзынд, кæнæ фæзындзæн, уымæ, æмæ снысан кæнын куыстадон компанитæн сæрмагонд паддзахадон æххуысы мадзæлттæ. Уыимæ, лæмбынæгдæр æргом аздахын хъæуы, коронавирусы инфекциимæ баст уавæр сæ архайд кæмæн фæкъуыхцы кодта, уыцы куыстуæтты уавæрмæ. Уыцы паддзахадон æххуыс хъуамæ уа пайдайаг æмæ афойнадыл, — фæнысан кодта Битарты Вячеслав.

Экономикон уавæр цудын ма бауадзынæн  цы уæлæмхасæн мадзæлттæ нысангонд цæуы, уыдоны тыххæй бæстон радзырдта республикæйы экономикон рæзты министр Томайты Хъазыбег. Министры ныхасмæ гæсгæ, куыстуæттæ æмæ иннæ организацитæн лæвæрд цæудзысты бæлвырд æмæ ахсджиаг зæрдæдарæнтæ, зæгъæм, 2020 азы дыккаг æмæ æртыккаг кварталты иуæй-иу хъалонты фиддонтæ фæкъаддæр кæндзысты. Кæнæ транспортон хъалон фидыны хъуыддаджы экономикæйы реалон къабæзты кусæг компанитæн уыдзæн уыцы хъалонæн æрмæстдæр йе ‘мбис фидыны фадат. Уымæй уæлдай, 2020 азы дыккаг æмæ æртыккаг кварталты зæххы æмæ исбонады хъалонæй суæгъд кæндзысты, чысыл амалхъомады компаниты продукци чи уæй кæны, уыцы базарадон центртæ. Томайы-фырты ныхасмæ гæсгæ, министрад бакусдзæн ахæм сæрмагонд паддзахадон æххуысы æндæр мадзæлттыл дæр.

Штабы уæнгтæ боны фæткы фарстытыл дзургæйæ, рахастой бæлвырд фæндæттæ. Ныр дарддæр уыцы фæндæттæ æмæ фиппаинæгтыл æрдзурдзысты Экономикон рæзты министрад æмæ иннæ профилон ведомствæты специалисттæ.

Æмбырдæн хатдзæгтæ кæнгæйæ, Битарты Вячеслав куыд фæнысан кодта, афтæмæй штаб йæ куыст кæндзæн иудадзыгон фæткы, уыимæ йæ æмбырдтæ арæзт цæудзысты къуыри иу хатт. Йæ ныхасмæ гæсгæ, уæлдай ахсджиагдæр у сæвзæргæ уавæрæн æппæтвæрсыг æмæ аккаг аргъ кæнын, стæй бæлвырд æмæ пайдайаг уынаффæтæ афойнадыл хæссын.

 

РЦИ-Аланийы

Сæргълæууæджы æмæ Хицауады

пресс-службæ

ОСТАВЬТЕ ОТВЕТ

Please enter your comment!
Please enter your name here