Къæвдайы фæстæ хурбон дæр скæндзæн

0
44

Нæ горæты цæрджытæн сæ уарзондæр бынæттæй иу ссис, Терчы былгæрæтты цы тезгъогæнæн фæндаг арæзт æрцыд, уый. Ам кæдфæнды дæр фенæн вæййы алы кары бирæ адæймæгты. Тезгъогæнджытæ дзы фылдæр вæййы сабат æмæ хуыцаубоны, фæлæ кусгæ бонты дæр изæрæрдæм ардæм фæтындзынц горæты сæдæгай цæрджытæ.
Терчы былгæрæтты цы хиирхæфсæн æмæ спортивон фæзтæ арæзт æрцыд, уым нæ горæты цæрджытæн хорз фадæттæ ис се ‘нæниздзинад фидардæр кæнынæн. Хъесаты Колкайы уынджы Терчы был цы спортивон комплекс ис, уым ис футболæй, баскетболæй, волейболæй хъазæн фæзтæ æмæ хинайæн бассейн. Уымæй уæлдай ма ам ис алыхуызон тренажертæ, æмæ дзы алы адæймагæн дæр йæ бон у лæвар йæ физикон цæттæдзинад фидардæр кæнын.
Ардæм æнæзивæгæй цæуынц, куыд æрыгон спортсментæ, афтæ хистæр кары нæлгоймæгтæ æмæ сылгоймæгтæ дæр. Тренажертыл хъæлдзæгæй фæархайынц ас адæймæгтæ æмæ сывæллæттæ. Хъæлдзæг уавæры Терчы был арæх фæцæуынц алыхуызон ерыстæ, æмæ дзы фæархайынц алы кары нæлгоймæгтæ æмæ сылгоймæгтæ.
æрвылаз апрелæй райдай æмæ суанг фæззæджы кæронмæ Терчы был тезгъогæнджыты нымæц мингæйттæм схизы. Хъыгагæн, ацы аз апрел раздæрау хъæлдзæг нæ рауад. Ног хæцгæ низы азарæй цы уавæр сæвзæрд, уый фадат нæ дæтты ардæм æнæдызæрдыгæй æрбацæуынæн. Бæргæ, бирæты фæфæнды Терчы был се уæнгтæ аивазын, фæлæ адæмы æнæниздзинадыл аудгæйæ, нæ республикæйы Хицауад цы мадзæлттæ аразы, уыдон домынц, ацы мæй дæр ма бафæразын æмæ фылдæр хæдзары уæвын.
Ацы хъуыддаг чи ‘мбары æмæ Хицауады бардзырд чи æххæст кæны, уыдоны нымæц бирæ кæй у, ууыл дзурæг у, ацы бонты Терчы былгæрон тезгъогæнæн фæндагыл адæм хæрзчысыл кæй ис, уый. Сабат æмæ хуыцаубоны дзы фенæн уыдис, пъæлицæйы кусджыты æмæ, доны былты фæндæгтæ чи цалцæг кæны, уыцы кусджыты. Уыдон бындуронæй ивынц, Хъесайы-фырты уынджы цы спортивон-хиирхæфсæн комплекс ис, уый бацæуæнтæ.
Кусджытæ куыд загътой, афтæмæй сæ зæрды ис фæндæгтæ бацæттæ кæнын карантины фæудмæ. Иуныхасæй, фыдбон æмæ фыдлæг бирæ нæ хæссынц, æмæ та тагъд Терчы был фæлладуадзæг адæмæй кæй байдзаг уыдзæн, уый нæ уырны. Ныр та уал бафæразын хъæуы тæссаг низы фесæфтмæ.
Уый æнæмæнг кæй уыдзæн, ууыл гуырысхо нæ кæнæм, фæлæ, цас тагъддæр уа, уыйас хуыздæр. Къæвдайы фæстæ хурбон дæр скæндзæн, æмæ та сног уыдзысты цины хабæрттæ æмæ спортивон ерыстæ дæр!

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here