Хъæндзинæдтæ аиуварс кæнынæн

0
14

Æппæтуæрæсеон адæмон фронты цæгатирыстойнаг хайады активисттæ Дзæуджыхъæуы администрацийæн бафæдзæхстой Доваторы проспекты 244-246 æмæ Щорсы уынджы 201/2 бирæфатерон хæдзæртты кæртытæ аивгæнæн куыстыты хæрзхъæддзинадмæ сæ цæст дарын.

— Федералон программæ «Удæнцой горæтаг уавæрты арæзтад»-мæ гæсгæ сын аразджытæ  раздæр зæрдæ бавæрдтой кæртытæ фарон июлы сцалцæг кæнын, уый фæстæ та — декабры. Цалдæр мæйы дæргъы ацы фарсты фæдыл горæты администрацимæ фыстæджытæ æрвыстам, æмæ нын мæнæ  ахæм дзуапп  радтой: «Гæххæттытæ куыд амонынц, афтæмæй уæ хæдзæртты кæртытæ аивгонд æрцыдысты», — зæгъы  хæдзæрттæй иуы цæрæг Гæдиаты Анатоли.

Адæмон фронты эксперттæ  куыд раиртæстой, афтæмæй   дзы ис къорд аиппы.

— Мæнмæ гæсгæ, куыстытæ æххæстгонд куыд цæуынц, горæты разамынд уымæ йæ цæст куыд æмбæлы, афтæ нæ дардта. Æнæмæнг æххæстгæнинаг куыстыты хай дæр æххæстгонд не ‘рцыд, ома, фæндаджы уæлцъар æмæ бордюртæ ивд не ‘рцыдысты, ног фæхсбандæттæ, цырæгътæ æмæ дзы урнæтæ нæ сæвæрдтой. Баивтой æрмæст бордюрты æмæ асфальты  иуæй-иу хæйттæ. Фæхсбандæттæ æмæ цырæгътæ  фæзындысты æрмæстдæр иу хæдзары раз, — зæгъы Адæмон фронты регионалон штабы уæнг Александр Купцов.

— Аивгæнæн куыстытæ æххæстгонд кæй æрцыдысты, уыцы гæххæттытæ чи бацæттæ кодта æмæ дзы йæ къух чи  сæвæрдта, уый ничи зоны. Горæты администрацийы минæвæрттæ ацы хæдзæртты цæрджытæм куы æрбацæуиккой, сæ фиппаинæгтæм сын куы байхъусиккой æмæ  аиппытæ аиуварс кæныныл куы бацархаиккой, уæд уый растдæр уаид, — зæгъы æхсæнадон организацийы минæвар.

Адæмон фронты уæнгтæ æмбырдгонд хабæрттæ барвыстой горæты администрацимæ. Фарст лыггонд æрцæудзæн æви нæ, уымæ йæ цæст дары Æппæтуæрæсеон адæмон фронт.

 

 

БÆДТИАТЫ Оксанæ

ОСТАВЬТЕ ОТВЕТ

Please enter your comment!
Please enter your name here