Зынаргъ мын сты сæ нæмттæ

0
15

Сфæлдыстадон куыст кæнын 40 азæй фылдæр. Уыцы рæстæгмæ сарæзтон бирæ номарæн къæйтæ, скульптурон композицитæ. Мæ архайды  сæйрагдæртæй иу у Фыдыбæстæйы Стыр хæсты темæ.

Нæ бæстæйыл уæззау бонтæ куы скодта, уæд нырма сывæллон уыдтæн. Фæлæ æмбæрстон, нæ бæстæ цы фыдбонтæ æвзары, уый. Уыцы тугуарæн азты  хъæбатырæй цы хæстонтæ фæмард сты, уыдоны номыл арæзт мемориалон комплексты ‘хсæн зынгæ бынат ахсы Ногхъæуы хæстонты номарæн мемориалон цыртдзæвæн. Сарæзтон æй ацы хъæуæй рацæуæг, Фыдыбæстæйы Стыр хæсты ветеран Хуыриаты Хазбийы фæндонмæ гæсгæ.

Иу райдзаст бон 1988 азы Дзæуджыхъæуы Нывгæнджыты цæдисы равдыстыты залы уыд мæ сæрмагонд равдыст. Бабæрæг æй кодта æмæ мын уым Ногхъæуы зынгхуыст хæстонтæн  цыртдзæвæн саразыны тыххæй йæ фæндон загъта. Уым мын федта ацы цыртдзæвæнæн йæ къаддæргонд вариант. Равдыстам æй Ногхъæуы колхозы уæды сæрдар Тедеты Павелмæ. Æмæ уый зæрдæмæ дæр фæцыд.

Афтæмæй цыртдзæвæн кадджын уавæры байгом кодтам 1991 азы. Уыцы бон хъæумæ æрцыдысты нæ республикæйы уæды Президент Галазты Æхсарбег (цыртдзæвæн гом дæр уый бакодта) хицауады уæнгтæ, ветеранты республикон советы минæвæрттæ, хъæуы цæрджытæ. Суанг ма дзы уыд оператор æмæ уацхæссæг Центрон телеуынынадæй.

Уыцы цыртдзæвæны тыххæй бирæ арфæтæ райстон йæ бакæныны боны фæстæ дæр. Ацы сфæлдыстадон куысты тыххæй мын фæстæдæр саккаг кодтой  Хетæгкаты Къостайы номыл паддзахадон преми.

 

ДЗБОЙТЫ Михал,

УФ-йы сгуыхт æмæ

РЦИ-Аланийы адæмон нывгæнæг

ОСТАВЬТЕ ОТВЕТ

Please enter your comment!
Please enter your name here