Адæмы куырдиæттæ — Президенты минæвармæ

0
29

Уæрæсейы Федерацийы Президенты Æххæстбарджын минæвар Цæгат Кавказы федералон зылды Юрий ЧАЙКАЙÆН видеоконференцийы фæрцы фембæлд уыд регионты цæрджытимæ. Цæгат Кавказы федералон зылды цæрджытæ Президенты минæвармæ цы куырдиæттæ балæвæрдтой, уыдоны фæдыл хаст æрцыдысты бæлвырд уынаффæтæ.

Цæгат Ирыстонæй фембæлды архайдтой республикæйы Сæргълæууæг Битарты Вячеслав, стæй Хицауады иннæ бæрнон кусджытæ.

Уыцы бон Юрий Чайкамæ алыхуызон куырдиæттимæ чи бахатыд, уыдонæй иу уыд нæ республикæйы цæрæг Исмаил Куразов. Уый Президенты минæвармæ бахатыд, цæмæй уынаффæ хаст æрцæуа Мæздæджы районы Хъызлары хъæуы ног скъолайы арæзтад фæраздæр кæныны фæдыл. Бынæттон цæрæджы ныхасмæ гæсгæ, хъæуы ныртæккæ кусы дыууæ скъолайы, фæлæ сæ иу дæр дзуапп нал дæтты нырыккон домæнтæн.

Битарты Вячеслав куыд фæнысан кодта, афтæмæй республикæйы разамындæн зындгонд у уыцы тыхстаг фарст. Йæ ныхасмæ гæсгæ, уыцы хъуыддагмæ адæм се ‘ргом аздæхтой, республикæйы разамонæгимæ сын фембæлд куы уыд, уæд. Æмæ ныридæгæн бæлвырд организацион мадзæлттæ арæзт æрцыд, цæмæй фарст лыггонд æрцæуа. Зындгонд куыд у, афтæмæй 2017 азы 28 декабры УФ-йы Хицауад сфидар кодта сæрмагонд уынаффæ РЦИ-Аланийы ахсджиаг социалон объектты арæзтад æмæ цалцæджы фæдыл. Уыцы объекты номхыгъды ис Хъызлары ног скъолайы арæзтад дæр.

— Мæздæджы районы администраци ныридæгæн сбæлвырд кодта, ног скъола арæзт кæм æрцæудзæн, уыцы бынат. Арæзтады фæдыл цы тендер расидтыстæм, уый бæрæггæнæнтæм гæсгæ бæлвырдгонд æрцыд подрядон организаци. Арæзтады фæдыл æппæт хъæугæ проектон-сметон документаци хæстæгдæр рæстæг уыдзæн цæттæ, — Президенты минæварæн радзырдта Цæгат Ирыстоны Сæргълæууæг.

Куыд загъд уыд, афтæмæй Хъызлары ног скъолайы арæзтад цæудзæн сæрмагонд федералон программæ «Ахуырады рæзт»-ы фæлгæты. Пъланмæ гæсгæ, ахсджиаг социалон объект арæзт æрцæудзæн 2021 азы.

Цæгат Кавказы иннæ регионты цæрджыты куырдиæттæм дæр байхъусгæйæ æмæ бæлвырд амынддзинæдтæ ратгæйæ, Президенты Æххæстбарджын минæвар куыд фæнысан кодта, афтæмæй фарстытæ алыг кæнынæн æппæтвæрсыг æххуыс уыдзæн федералон ведомствæты ‘рдыгæй дæр.

 

РЦИ-Аланийы

Сæргълæууæджы æмæ Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here