Мæскуыйаг дохтырты æххуыс

0
36

Цæгат Ирыстонмæ стахт мæскуыйаг дохтырты бригад бынæттон медицинон кусджытæн сæ фæлтæрддзинадæй баххуыс кæнынмæ.  Уыдон куыстой Мæскуы æмæ мæскуыйаг облæсты рынчындæтты, ног коронавирусон низæй адæмы дзæбæх кодтой.

Къордæн разамынд дæтты Л.А. Ворохобовы номыл мæскуыйаг 67-æм рынчындоны хирургийы центры хицау Константин Покровский. Мæскуыйаг дохтыр куыд загъта, афтæмæй Цæгат Ирыстоны уавæр хуымæтæг схонæн нæй. «Мах æм æппынæдзух нæ хъус дардтам, бынæттон дохтырты дæсныдзинадыл гуырысхо нæ кæнæм, фæлæ нæ фæнды, хæцгæнизы ныхмæ куыст Мæскуыйы куыд арæзт у, уыдæттимæ сæ базонгæ кæнын», — бафиппайдта Константин Покровский.

Йæ ныхæстæм гæсгæ, къорды ис реаниматолог, инфекционист, пульмонолог, компьютерон томографийы дохтыр. Уыдон иууылдæр куыстой тæссаг зонæйы. Хъуамæ специалисттæ Цæгат Ирыстоны кусой дыууæ къуырийы дæргъы, фæлæ, куы бахъæуа, уæд фылдæр рæстæг дæр баззайдзысты.

Æнæниздзинад хъахъхъæнынады министрадæй куыд фехъусын кодтой, афтæмæй мæскуыйаг дохтыртæ семæ сластой ног хæцгæниз дзæбæхгæнæн хостæ, нæ рынчындæтты кусджытæн хи бахъахъхъæныны фæрæзтæ. Иумæйагæй 55 милуан сомы аргъ. Зындгонд куыд у, афтæмæй мæскуыйаг дохтырты бригадтæ тыхстагдæр регионтæм фæраст сты Мæскуыйы мэр Сергей Собянины амындмæ гæсгæ. Цæгат Ирыстонæй уæлдай, се ‘ххуысы хай бакæндзысты Мæхъæлы, Дагестаны республикæты æмæ Фæсбайкалы крайы.

 

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here