Æрдзон фыдбылызы фæстиуджытæ

0
30

3 июны изæрæй республикæйы иуæй-иу бынæтты цы тыхджын дымгæ æмæ къæвдатæ уыд, уыдоны фæстиуджытæ афтæ карз рауадысты, æмæ Рахизфарс æмæ Æрыдоны районты бахъуыд æнæнхъæлæджы уавæры фæтк æрæвæрын.

Дыууæ районы дæр, стæй Дзæуджыхъæу æмæ æндæр бынæтты хъыгдард баййæфтой цæрæн хæдзæрттæ æмæ социалон нысаниуæджы объекттæ. Тыхдымгæ кæмдæр хæдзæртты сæртæ систа, кæм та — бæлæстæ æдуидæгтæ стыдта…

Æнæнхъæлæджы уавæрты министрады пресс-службæ куыд фехъусын кодта, афтæмæй, зæгъæм, Беслæны хъыгдард баййæфтой районы мидхъуыддæгты хайады, цалдæр астæуккаг скъола æмæ 4-æм рæвдауæндоны бæстыхæйттæ, стæй бирæ хæдзæртты сæртæ. Ахæм уавæры бахаудысты Æрыдоны районы цалдæр цæрæн бынаты дæр. Кæй зæгъын æй хъæуы, хъыгдард баййæфтой электрон тыхдæттæн хызтæ æмæ æндæр коммуникацитæ дæр.

Дыууæ районмæ дæр æвæстиатæй атагъд кодтой УФ-йы Æнæнхъæлæджы уавæрты министрады РЦИ-Аланийы Сæйраг управленийы ирвæзынгæнæг къордтæ. Уыцы изæр республикæйы Хицауады Сæрдар Тускъаты Таймураз Беслæны сарæзта æвæстиатон æмбырд сæвзæргæ уавæры фæдыл.

Знон райсомæй та Æнæнхъæлæджы уавæрты министрад æмæ иннæ сæрмагонд службæты радгæс къордтæ бавнæлдтой фыдбылызы фæстиуджытæ иуварс кæнынмæ. Фæстæдæр Æнæнхъæлæджы уавæрты министрады управленийы пресс-службæ куыд фехъусын кодта, афтæмæй боны æмбисмæ ногæй скуыстой Хъæдгæроны, Мичурины æмæ иннæ хъæуты электрон тыхдæттæн хызтæ. Боны дæргъы куыст цыд иннæ коммуникацитæ банывыл кæныныл, стæй фыдбылызы иннæ фæстиуджытæ аиуварсыл.

Уыимæ, районты кусын райдыдтой, тыхдымгæ æмæ къæвдатæ цы зиантæ ракодтой, уый хынцæг сæрмагонд къамистæ.

Фæстæдæр Цæгат Ирыстоны Хицауады Сæрдары хæдивæг Томайты Ирбег журналисттæн куыд фехъусын кодта, афтæмæй æрдзон фыдбылызы фæстиуджытæ иуварсгæнæн куыстыты архайынц 400 адæймагæй фылдæр. Уыдонæн æххуысæн радих кодтой алыхуызон техникæйы 50 иуæгæй фылдæр.

 

КАЛМАНТЫ Аслан

ОСТАВЬТЕ ОТВЕТ

Please enter your comment!
Please enter your name here