Рынчынты уавæрмæ — бæстон цæстдард æппæт къæпхæнтыл дæр

0
62

Цæгат Ирыстоны Сæргълæууæг БИТАРТЫ Вячеслав сарæзта коронавирусы инфекци парахат кæнынæн гæрæнтæ æвæрыны фарстыты фæдыл республикон оперативон штабы радон æмбырд.

Боны фæткы фарстытыл ныхасы архайдтой Хицауады Сæрдар Тускъаты Таймураз, æнæниздзинад хъахъхъæнынады министр Годжыцаты Тамерлан, æндæр ведомствæты разамонджытæ. Рынчындæттæ æмæ поликлиникæты сæйраг дохтыртæ фембæлды архайдтой видеоконференцийы бастдзинады фæрцы.

Республикæйы разамонæг Æнæниздзинад хъахъхъæнынады министрад æмæ медицинон кусæндæтты бæрнон кусджытæн бахæс кодта, цæмæй, рынчындæттæй кæй рафыстой æмæ йæхи дарддæр хæдзары чи дзæбæх кæны, уыцы адæмы уавæрмæ иудадзыг бæстон цæстдард уа.

— Комкоммæ бастдзинад дарут уыцы адæмимæ, рæстæгæй-рæстæгмæ бæрæг кæнут, хостæй цас ифтонг сты, уый. Уыимæ, алкæцы æххуысхъуаг адæймаджы уавæрмæ дæр комкоммæ хъуамæ сæ хъус дарой поликлиникæтæ æмæ районты рынчындæтты сæйраг дохтыртæ дæр. Рынчындоны фæстæ уыцы адæмæн поликлиникæты куыд лæггад кæнынц, уымæ ис бирæ фиппаинæгтæ, æмæ уавæр æвæстиатæй хъæуы банывыл кæнын, — бацамыдта республикæйы Сæргълæууæг.

Оперативон штабы уæнгтæ сæрмагондæй æркастысты, ног низæфтауæгимæ кæм тох кæнынц, уыцы рынчындæттæ хъæугæ медицинон техникæйæ куыд ифтонг сты, уымæ дæр.

Уыцы фарстыл дзургæйæ, Æнæниздзинад хъахъхъæнынады министрады минæвæрттæ куыд фехъусын кодтой, афтæмæй Цæгат Ирыстоны паддзахадон медицинон академийы клиникæйы ныридæгæн бацæттæ кодтой 100 бынаты коронавирусæй рынчынтæн. Хъæуы ма æрмæстдæр рынчындоны томограф ног аппаратæй раивын.

Коронавирус дзæбæх кæныны хъуыддаджы сæрмагонд нысаниуæг ис рæуджытæ туаггуырæй æфсадæг аппараттæн дæр. Æмæ бæлвырд архайд цæуы, цæмæй ахæм аппараттæ республикæйы фылдæр уа. Зæгъæм, хæстæгдæр бонты Дзæуджыхъæумæ сласдзысты 5 ахæм аппараты. Уымæй уæлдай, дыууæ къуырийы æмгъуыдмæ Ирыстонмæ ноджыдæр ма схæццæ уыдзæн 25 аппараты.

Штабы æмбырдæн хатдзæгтæ кæнгæйæ, Битарты Вячеслав бæлвырд амынддзинæдтæ радта ведомствæтæ æмæ медицинон кусæндæтты разамонджытæн. Сæрмагондæй Битары-фырт йе ‘ргом аздæхта Сывæллæтты республикон клиникон рынчындоны соматикон хайады цалцæг кæныны æмæ сывæллæтты ног поликлиникæйы арæзтады фарстмæ. Куыд нысангонд цæуы, афтæмæй ацы дыууæ ахсджиаг медицинон кусæндоны хъуамæ байгом уой 2020 азы кæрон.

 

РЦИ-Аланийы

Сæргълæууæджы æмæ Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here