Ивддзинæдтæ æрцыд

0
34

Журнал «Ногдзау» у Цæгат æмæ Хуссар Ирыстоны сывæллæтты иунæг журнал. Нæ мыхуыры фæрæзты æхсæн ын ис йæхи сæрмагонд бынат, у сæ рагондæртæй иу.

Ныр 80 азæй фылдæр циндзинад, зонды рухс æмæ фарн хæссы Ирыстоны сабитæн. Сæ рæзгæ удтæм ын ис йæхи фæндаг. Кæд алы рæстæджыты журнал йæ ном ивта (йæ рацыды фыццаг азты хуынд «Сырх дидинæг», фæстæдæр — «Пионер»), уæддæр йæ нысан у иу — сабиты удты бæркадыл хорзæрдæм ахадын, цардмæ сæ цæттæ кæнын.

Æрæджы журналы æрцыд стыр ивддзинæдтæ, фæлæ дзы цы фæрнджын æгъдæуттæ уыд, уыдон рохуаты нæ баззадысты. Цард размæ цæуы, ивынц йæ домæнтæ дæр, æмæ редакцийы кусджытæ сæ хæсыл нымайынц абоны домæнтæм гæсгæ журналмæ ивддзинæдтæ бахæссын, цæмæй йæ æрыгон фæлтæр зæрдиагдæрæй кæсой.

Журналы рубрикæтæ баст сты не ‘гъдæуттимæ, культурæимæ, аивадимæ, бæрæгбæттимæ, этикетимæ. Рубрикæ «Ирон мыггæгтæ» зонгæ кæны мыггæгты равзæрдимæ. Рубрикæ «Ирыстоны зайæгойтæ æмæ цæрæгойтæ»-йы дзурæм, Ирыстоны цы зайæгойтæ æмæ цæрæгойтæ ис, уыдоны тыххæй. Рубрикæ «Ахуыр кæнæм ирон æвзаг» æххуыс у, æвзаг ахуыр кæнын йæ зæрды кæмæн ис, уыдонæн, уæлдайдæр — чысыл сабитæн

Журналы бирæ азты уыд рубрикæ «Хуры тын». Уым мыхуыргонд цыдысты æрыгон авторты уацмыстæ. Абон уыцы рубрикæйæн аивта æрмæстдæр йæ ном. Сидæм æрыгон автортæм: табуафси, хæссут нæм уе ‘рмæджытæ, мах сæ зæрдиагæй мыхуыр кæндзыстæм. Тынг нæ фæнды , цæмæй нæм Хуссар Ирыстоны сабитæ дæр æрвитой се сфæлдыстад.

Абон сусæггаг никæмæнуал у, сывæллæттæ арæх кæй пайда кæнынц Интернеты лæггæдтæй. Мах тынг архайæм, цæмæй журнал ссара йæ кæсæджы æмæ йæ ма фесафа. Журнал «Ногдзау»-ы сæйраг хæс у пайда хæссын, не ‘взаг бахъахъхъæныныл архайын, æрыгон фæлтæрæн нæ фыдæлты хорз æгъдæуттæ уарзын кæнын.

Журнал «Ногдзау» социалон хызæгты арæх скæны алыхуызон конкурстæ, æмæ дзы сывæллæттæ тынг зæрдиагæй бацархайынц. Конкурсты домæнтæ вæййынц хæрз хуымæтæг. Æнæмæнг фæхъæуы видеоролик сисын æмæ йæ æрбарвитын сæрмагонд телефоны номырмæ.

Конкурс «Уæлахизы 75 азы бонмæ» -йы 80 сывæллоны архайдтой дыууæ номинацийы: «Прозæ» æмæ «Поэзи»-йы. Ацы мадзал уыд тынг ахсджиаг æрмæст уый тыххæй дæр, æмæ сывæллæттæ радзырдтой, Фыдыбæстæйы Стыр хæсты сæ бинонтæй знаджы ныхмæ чи хæцыд, уыдоны тыххæй.

«Бинонты конкурс»-ы архайыны фадат уыд бинонты уæнгтæн се ‘ппæтæн дæр. Ацы конкурс бацымыдис кодта 30 бинонты. Цæмæй конкурсы архайай, уый тыххæй хъуыд кæнæ акафын, кæнæ азарын. Тынг æхсызгон нын уыд, уый бæрц сывæллæттæ дзы кæй архайдта, уый.

Хъыгагæн, коронавирус журналы куыстмæ бахаста ивддзинæдтæ. Фæлæ уæддæр куыст не ‘рлæууыд. Конкурстæ «Бузныг, ахуыргæнæг» æмæ «Бузныг, дохтыр»-æй фæндыд бузныджы ныхас зæгъын, ахæм зын рæстæг цы дохтыртæ æмæ ахуыргæнджытæ фыдæбон кæнынц, уыдонæн.

Æмткæй райсгæйæ, конкурсты чи архайдта, уыдоны нымæц хæццæ кæны 500-мæ. Чи сæм бакаст, уыдон та уыдысты 100 минæй фылдæр. Уый дзурæг у, сывæллæтты зæрдæмæ ахæм мадзæлттæ кæй цæуынц, ууыл.

Нæ журналкæсджытæ сты сабитæ, æмæ сын нæ зæрдæ зæгъы фидар æнæниздзинад. Царды хæрзтæй хайджын уæнт. Кæд абон зын рæстæг у, уæддæр ныййарджытæй курæм, цæмæй сæ хъæбултæн рафыссой журнал «Ногдзау». Сывæллæттæн уый уыдзæн стыр лæвар. Рафыссæн ын ис Уæрæсейы посты алы хайады дæр. Йæ аргъ у 260 сомы.

 

СÆЛБИТЫ Дианæ,

журнал «Ногдзау»-ы рауагъды редактор

ОСТАВЬТЕ ОТВЕТ

Please enter your comment!
Please enter your name here