Ног фæндаг — удæнцойдзинад

0
39

РЦИ-Аланийы фæндæгты хæдзарады комитеты сæрдар СОЛИТЫ Тариэль фембæлд республикæйы дзыллон хабархæссæг фæрæзты минæвæрттимæ. Куыд загъта, афтæмæй комитеты  сæйраг нысан у республикæйы фæндæгтæ æдас æмæ хæрзаив кæнын, адæмæн удæнцойдзинад куыд хæссой, афтæ. Цæгат Ирыстоны разамынд иудадзыг йæ хъус дары ацы къабазмæ.

Æнæбафиппайгæ нæй, афæдзæй-афæдзмæ æнцонвадатдæр кæй кæнынц федералон, регионалон æмæ муниципалон фæндæгтæ.

Комитеты кусджытæ æппынæдзух æвзарынц фæндæгты уавæр, сæ лæмæгъдæр бынæттæ.

Журналистты фарстытæн дзуапп дæтгæйæ, Солиты Тариэль лæмбынæг радзырдта, Мæздæгмæ ног фæндаджы арæзтад куыд цæуы, уый тыххæй.

— Фыццаджыдæр, зæгъдзынæн, фæндаджы арæзтады кæй пайда кæнынц нырыккон технологитæй, арæзтадон æрмæг иууылдæр у бынæттон, битумæй уæлдай нæ никæцæй ницы ласын бахъæудзæн. Фæндаджы арæзтадæн цы миллиард 800 милуан сомы радих кодтой, уыдонæй уал 2019 азы бакуыстой 344 милуаны. Уæрæсейы Президент Владимир Путины комкоммæ бардзырды руаджы, стæй нæ республикæйы Сæргълæууæг Битарты Вячеславы хæдзардзин архайдæй фæзындысты æхцайы фæрæзтæ, æмæ фæндаджы арæзтадон куыстытæ æнæкъуылымпыйæ цæуынц. Автомобилон фæндаг «Кавказ»-ы иу хайыл цы фæндаг арæзт цæуы, уый стыр бæллиццаг уыд адæмæн бирæ азты. Дзæуджыхъæу нæ республикæйы стырдæр æмæ бæркадджындæр районимæ бабæтдзæн, уыдзæн дыууæ хатты цыбырдæр, цæудзæн нæхи зæххыл. Хорз фæндæгтæ цы ран уа, уым та экономикæйæн æнæ рæзгæ нæй, фæндаггон бастдзинад фадат ратты базарадон ахастдзинæдтæн, туризмæн. Абон фæндагаразæг дагестайнаг компани «Дагспецстрой-Сервис»-ы специалисттæ æнæрлæугæйæ кусынц 58 километры дæргъæн фæндагыл. Техникон бæрæггæнæнтæм гæсгæ хаудзæн III техникон категоримæ, йæ уæрх уыдзæн аст метры бæрц, фæндаджы былгæрæттæ фидаргонд æрцæудзысты. Хуымæтæг фæндаг нæ уыдзæн, ис ыл æртæ стыр хиды, йæ бынты цæуы 32 донуадзæн хæтæлы. Кусы дзы 300 адæймаджы бæрц, уыдонæн сæ фылдæр сты арæзтадмæ хæстæг хъæуты цæрджытæ. Зилгæ æмæ Бæтæхъойыхъæу, Малгобек, Хурыхъæу æмæ станицæ Сухотскаяйы цæрджытæн ног фæндаг, æнæмæнг, хорзæрдæм фæзындзæн сæ царды уавæртыл, ног æнтыстытæ кæй æфтдзæн сæ къухы, уый мæ уырны, — загъта Солийы-фырт.

Уымæй уæлдай ма комитеты сæрдар фæнысан кодта, хæстæгдæр фидæны фæндаджы арæзтад дарддæр ахæццæ кæнынмæ кæй хъавынц, цæмæй Ирыстонæй комкоммæ Стъараполы краймæ бацæуæн уа.

Комитеты сæрдары бафарстой, историон хæзна — Алайнаг горæт арæзтады рæстæг хъыгдард кæй баййæфта, уымæн цы гæнæн ис, зæгъгæ.

— Куыддæр рабæрæг ис хабар, афтæ куыстытæ 800 метры уаццагыл баурæдтой. Проектмæ цы ивддзинæдтæ бахастой, уыдон конд цæудзысты подрядон организацийы хардзæй. Уыцы хъуыддаг нæ фæзындзæн арæзтады æмгъуыдыл. Афтæмæй, Мæздæгмæ комкоммæ фæндаг байгом уыдзæн 2020 азы кæрон.

Солиты Тариэль ма журналисттæн радзырдта, Æрыдоны районы Мичурины хъæуы иувæрсты цы фæндаг аразын райдыдтой, уый тыххæй. 5,6 километры фæндаджы арæзтадæн ахицæн йæ фыццаг хай, хаудзæн I техникон категоримæ, арæзтадæн радих кодтой миллиард 420 милуан сомы. Ног фæндаг  байгом уыдзæн 2021 азы.

 

ЦÆГÆРАТЫ Жаннæ

ОСТАВЬТЕ ОТВЕТ

Please enter your comment!
Please enter your name here