Зындгонд скульпторы ног куыст

0
26

Фыдыбæстæйы Стыр хæсты рæстæг  не ‘мзæххонтæ цы лæгдзинад равдыстой, ууыл цас фылдæр азтæ цæуы, уыйбæрц нын уыдоны тыххæй  мысинæгтæ зынаргъдæр сты. Ныртæккæйы фысджытæ, историктæ сыл фыссынц аивадон æмæ историон документалон уацмыстæ. Сæ номыл бæстæйы æрыгон æмæ фæлтæрдджын  скульптортæ аразынц цыртдзæвæнтæ.

9 маймæ ахæм цыртдзæвæн (уынут æй къамы) Дзæуджыхъæуы бынæттон хиуынаффæйады администрацийы фæндæй æвæрд æрцыд  Дзæуджыхъæуы Намысы мемориалы. Йæ автор у УФ-йы сгуыхт нывгæнæг, нæ бæстæйы Нывгæнынады академийы кадджын академик Дзукъаты Никъала.

Скульптор нын куыд радзырдта, афтæмæй цыртдзæвæн æвæрд æрцыд, нæ республикæйæ Фыдыбæстæйы Стыр хæсты чи архайдта æмæ дзы чи нал сыздæхт, уыцы хъæбатыр сæрæнгуырдты ном арынæн, стæй Ирыстоны  чи хæцыд, уыцы сырхæфсæддонтæн. Кусгæ та йыл кодта цыппар мæйы. Йæ сæйраг скульптурæ у фондз метры æмæ æрдæг. Дзукъайы-фырт ын радта ном «Хъыггæнæг мад». Йæ фæйнæфæрсты та — дыууæ рельефы. Сæ алкæцыдæр — 10 метры.

— Æхсызгон мын у, нæ горæты разамынд ахæм цыртдзæвæн саразын мæнæн кæй бахæс кодта, уый. Уымæн æмæ алы зынгхуыст ирыстойнаг хæстоны ном дæр мæнæн зынаргъ у, уæдæ сын се сгуыхтытæ дæр зæрдыл дарын кæй хъæуы, уый фæсивæд дæр ацы цыртдзæвæны фæрцы кæй зондзысты, уыцы хъуыддаг дæр нымаинаг у. Уæдæ, Намысы мемориалы композицион арæзт дæр кæй сфидауын кодта, ууыл нæ дызæрдыг кæнын, — загъта Никъала.

 

ГАСАНТЫ Валери

ОСТАВЬТЕ ОТВЕТ

Please enter your comment!
Please enter your name here