Рæзгæ фæлтæры хъомыс раргом кæнынæн

0
75

Республикæ Цæгат Ирыстон-Аланийы Сæргълæууæг БИТАРТЫ Вячеслав дзы сæрдариуæг кодта, афтæмæй уыд Цæгат Ирыстоны Рæзты агентады проектон офисы радон æмбырд.

Ацы хатт фембæлды архайджытæ се ‘ргом аздæхтой ахуырады фарстытæм.

Ныхасы архайдтой республикæйы Хицауады Сæрдары хæливджытæ Сæбæтхъуаты Æхсарбег æмæ Фадзайты Æхсарбег, видеоконференцийы бастдзинады фæрцы та — министрадтæ æмæ бæрнон ведомствæты разамонджытæ.

Фембæлды рæстæг сæрмагондæй æрдзырдæуыд химикон-биологон æмæ математикон ахуырады дарддæры райрæзтыл.

Афтæ, 2020-2021 ахуыры азы Дзæуджыхъæуы 27-æм астæуккаг скъолайы байгом уыдзæн сæрмагонд химикон-биологон 7-æм кълас. Уыцы сæрмагонд къласмæ ахуырдзауты цавæр фæткы бындурыл æвзардзысты, уый уагæвæрдтæ ныридæгæн сты цæттæ. Уый тыххæй радзырдта Хицауады Сæрдары хæдивæг Иринæ Азимова. Йæ ныхасмæ гæсгæ, уыцы къласы ахуыр кæныны фæндон чи равдиса, уыцы фæсивæдæн сæрмагонд фæлварæнтæ сараздзысты 28-29 июлы. Уыцы къласы ахуырдзаутимæ чи куса, ахæм специалисттæн рагагъоммæ сарæзтой сæрмагонд ахуыртæ. Афойнадыл балхæдтой сæрмагонд техникон ифтонггæрзтæ дæр (уыцы нысанæн фæрæзтæ дихгонд æрцыдысты национ проект «Ахуырад»-ы фæлгæты).

Химикон-биологон къласы ахуыр кæныны фæдыл уал ныридæгæн сывæллæтты ныййарджытæ æрбалæвæрдтой 12 куырдиаты (уыдон сты Дзæуджыхъæу æмæ республикæйы районты минæвæрттæ). Æмткæй райсгæйæ, августы кæронмæ къласы ахуырдзауты номхыгъд хъуамæ уа цæттæ.

Дарддæр Иринæ Азимова радзырдта химикон-биологон ахуырады райрæзты программæйы фæлгæты 2020-2029 азты ноджыдæр ма цы мадзæлттæ арæзт цæудзæн, уыдоны тыххæй. Йæ ныхасмæ гæсгæ, программæйы уагæвæрдтыл кусгæйæ, æнгом æмархайд уыдзæн республикæйы уæлдæр ахуыргæнæндæттимæ.

Зындгонд куыд у, афтæмæй фæстаг цалдæр азы Битарты Вячеславы хъæппæрисæй республикæйы æххæстгонд цæуы математикон ахуырады райрæзты сæрмагонд программæ. Уый фæлгæты байгом сты сæрмагонд математикон кълæстæ, математикæмæ æмхиц фæсивæды ахуырадæн бацæттæ кодтой бæстон æмæ ахадгæ программæтæ. Программмæйы бындурон ахуырадон кусæндон у Республикон физикон-математикон лицей. Уымæй уæлдай, программæйы уагæвæрдтыл кусынц «Кванториум» æмæ æндæр ахуырадон уагдæттæ. Рæзгæ фæлтæр цымыдисдзинад æвдисынц программæмæ, зæрдиагæй пайда кæнынц, математикон ахуырады сын цы ног фадæттæ фæзынд, уыдонæй. Æмæ сæ къухы æнтыстдзинæдтæ дæр æфты.

Уыцы программæ æххæст кæныны фæлтæрддзинад хынцгæйæ, куыст цæудзæн химикон-биологон ахуырады райрæзтыл дæр.

— Ахуырдзау фæсивæды хъомыс раргом кæнын ахсджиаг у æрмæст сæхицæн нæ, фæлæ æппæт æхсæнадæн дæр. Курдиатджын фæсивæды æппæтвæрсыг ахуырад æмæ сфæлдыстадæн хъуамæ уа хъæугæ фадæттæ — уый у республикæйы разамынды архайды фыццаградон нысантæй иу, — ныхасæн хатдзæгтæ кæнгæйæ, фæнысан кодта Битарты Вячеслав.

Республикæйы разамонæг бæлвырд амынддзинæдтæ радта профилон ведомствæтæ æмæ программмæтæ æххæст кæныныл комкоммæ бæрнон къордты уæнгтæн.

 

РЦИ-Аланийы

Сæргълæууæджы æмæ Хицауады

пресс-службæ

ОСТАВЬТЕ ОТВЕТ

Please enter your comment!
Please enter your name here