Сæрдыгон фæлладуагъды мадзæлттыл æрдзырдтой

0
58

Сывæллæтты сæрдыгон фæлладуагъд æмæ æнæниздзинад фидардæр кæныны кампани райдайыны фæдыл уынаффæ хаст цæудзæн, сæвзæргæ эпидемиологон уавæр хынцгæйæ. Уыимæ, сæрдыгон фæлладуагъдмæ цæттæгæнæн куыст пъланы бындурыл æххæстгонд цыд.

Ахæм хатдзæгтæм æрцыдысты Сывæллæтты сæрдыгон фæлладуагъд æмæ æнæниздзинад фæфидардæр кæныны, æнахъомтæн рæстæгмæ кусæн бынæттæ дæттыны фарстыты фæдыл сæрмагонд хицауадон къамисы уæнгтæ. Æмбырды сæрдариуæг кодта РЦИ-Аланийы Хицауады Сæрдары хæдивæг Иринæ Азимова.

— Зындгонд куыд у, афтæмæй, коронавирусы аххосæй сæвзæргæ эпидемиологон уавæр хынцгæйæ, Цæгат Ирыстоны Сæргълæууæг Битарты Вячеслав бæрзонд цæттæдзинады фæтк æмæ хииппæрддзинады мадзæлттæ адарддæр кодта 10 июлы онг. Уыимæ, карантины мадзæлттæй бирæтæ бынтондæр ивд æрцыдысты, хииппæрддзинады фæтк дæр фæрогдæр кодтой. Фæлæ, кæй зæгъын æй хъæуы, ног низæфтауæджы тæвагæй нырма æдас не стæм. Уавæрмæ иудадзыг бæстон цæстдард ис, æмæ, фадат куыддæр фæуа, афтæ бавналдзыстæм сывæллæтты сæрдыгон фæлладуагъд æмæ æнæниздзинад фидардæр кæныны мадзæлттæ æххæст кæнынмæ. Уымæ гæсгæ, сывæллæттæ æмæ æнахъомты сæрдыгон фæлладуагъд æмæ æнæниздзинад фидардæр кæныны кусæндæттæ сæ архайдмæ хъуамæ уой цæттæ, — фæнысан кодта Иринæ Азимова.

Боны фæткы фарсты фæдыл сæ хъуыдытæ загътой æмæ фæндæттæ бахастой фæллой æмæ социалон рæзты министр Хуыбиаты Барис, УФ-йы Æнæнхъæлæджы уавæрты министрады РЦИ-Аланийы Сæйраг управленийы цæстдарæн архайд æмæ профилактикон куысты хайады хицауы хæдивæг Хъайырты Зауырбег æмæ иннæ бæрнон кусджытæ.

Афтæ, Хуыбиаты Барисы ныхасмæ гæсгæ, иуæй-иу ивддзинæдтæ хаст æрцыд, сывæллæттæ æмæ æнахъомты сæрдыгон фæлладуагъд æмæ æнæниздзинад фæфидардæр кæныны куыст чи кæны, уыцы организациты реестрмæ. Уыцы номхыгъды ныртæккæ ис 145 алыхуызон кусæндоны. Æмæ уыдонæй алкæцыйы цæттæдзинадмæ дæр æркæсдзысты сæрмагонд къамисты уæнгтæ.

 

РЦИ-Аланийы

Сæргълæууæджы æмæ Хицауады

пресс-службæ

ОСТАВЬТЕ ОТВЕТ

Please enter your comment!
Please enter your name here