Ахсджиаг объекттæ — сæрмагонд паддзахадон программæты фæрцы

0
18

Цæгат Ирыстоны Хицауады Сæрдар ТУСКЪАТЫ Таймураз радон хатт æрзылд, паддзахадон программæтæ æмæ фыццаградон национ проектты фæлгæты республикæйы цы ахсджиаг социалон объекттæ арæзт цæуы, уыдоныл. Ацы хатт Хицауады Сæрдар бабæрæг кодта Дзæуджыхъæу æмæ Горæтгæрон районы арæзтадон фæзтæ.

Фыццаджы-фыццагдæр, премьер-министр федта, Республикæйы национ музейы рацарæзты куыстытæ куыд цæуынц, уый. Уый фæстæ инспекцион къорды уæнгтæ сæ фæндаг акодтой театр «Саби»-йыл. Уымæй уæлдай, базонгæ сты, А. Кадыровы уынджы 550-бынатон æмæ 18-æм микрорайоны 500-бынатон скъолаты, стæй Владикавказскаяйы уынджы 280-бынатон рæвдауæндоны арæзтæдтæ куыд цæуынц, уыимæ. Хицауадон къорды уæнгтæ бабæрæг кодтой микрорайон «Ног горæт» дæр. Уым та се ‘ргом аздæхтой донуадзæн æмæ электрон тыхдæттæн хæтæлтæ, стæй æндæр ахæм коммуникацитæ бирæфатерон цæрæн хæдзæрттæм куыд иугонд цæуынц, уымæ.

Уыцы объектты æппæт куыстытæ дæр цæуынц пъланмæ гæсгæ. Зæгъæм, дыууæ скъолайы дæр сентябрмæ хъуамæ уой цæттæ. Рæвдауæндоны арæзтадмæ та нырма ныр бавнæлдтой. Тускъаты Таймураз æмæ инспекцион къорды  иннæ уæнгтæ бынæтты аныхас кодтой подрядон организациты минæвæрттимæ, радон хатт фæбæлвырд кодтой куыстыты цыды фæтк æмæ æндæр организацион фарстытæ.

Стæй къорды уæнгтæ ацыдысты Чермены хъæумæ. Уым кæронмæ фæхæццæ кæны Культурæйы хæдзары цалцæг. Уыцы объекты æппæт куыстытæ дæр хъуамæ æххæстгонд æрцæуой 30 августмæ. Подрядон организацийы минæвæрттæ куыд радзырдтой, афтæмæй нысангонд æмгъуыдмæ объект уыдзæн цæттæ.

Цалцæггæнæн куыстытæ сæ тæмæны сты Ногиры  1-æм астæуккаг скъолайы агъуысты дæр. Зæронд бæстыхайы цалцæгæй уæлдай ам арæзт цæуы сæрмагонд агъуыст райдайæн кълæстæн, стæй ног спортивон зал æмæ хæрæндон. Ног проектмæ гæсгæ, скъолайы уыдзæн 440 бынаты (ныры 120 бынаты бæсты). Графикмæ гæсгæ скъола хъуамæ сцæттæ уа 2021 азы кæрон.

Йæ балцæн хатдзæгтæ кæнгæйæ, Тускъаты Таймураз куыд фæнысан кодта, афтæмæй подрядчиктимæ ныхасы рæстæг сбæрæг, уæлдæр амынд объектты чи кусы, уыцы адæмæн сæ зынгæ хай кæй сты æндæр регионтæй, уымæн æмæ республикæйы фаг нæй дæсны «кусæг тыхтæ». Уыцы æууæл хынцгæйæ, Хицауады Сæрдар ведомствæты разамонджытæн бахæс кодта, цæмæй фадæттæ саразой арæзтадон компанитæ æмæ уæлдæр æмæ астæуккаг профессион ахуыргæнæндæтты æмгуыстадæн. Уый фæрцы æрыгон специалисттæн хъуамæ фæзына арæзтадон объектты практикæ кæныны фадат.

— Ныртæккæ республикæйы арæзтадон æмæ цалцæггæнæн куыстытæ æххæстгонд цæуынц 100 объектæй фылдæры. Фæлæ дзы æз иуы дæр нæ федтон, цæмæй фæлтæрдджын кусджыты раз балæууой æрыгон сисамайджытæ, къулсæрдджытæ, исæн краныл кусджытæ æмæ æндæр ахæм дæсныйæдты минæвæрттæ. Афтæмæй та, æппæт уыцы дæсныйæдтыл дæр ахуыр кæнынц нæ профессион училищæты. Уыцы фарстытæм бæстон æркæсын хъæуы, цæмæй æрыгæттæ ахуыр кæной дæсны специалистты фæлтæрддзинадыл, — фæнысан кодта Тускъайы-фырт.

 

РЦИ-Аланийы

Сæргълæууæджы

æмæ Хицауады

пресс-службæ

ОСТАВЬТЕ ОТВЕТ

Please enter your comment!
Please enter your name here