Барбашовы фæз: абоны æмæ фидæны фæлтæртæн

0
35

Ивгъуыд сабаты Цæгат Ирыстоны Сæргълæууæг БИТАРТЫ Вячеслав архайдта, мемориалон комплекс «Барбашовы фæз» рацарæзты фæстæ ногæй кæй байгом, уыцы цауы фæдыл кадджын æмбырды. Не Стыр Уæлахизы 75 азимæ бастæй мемориал рацарæзтой, стæй дзы сæвæрдтой уæлæмхасæн номарæн æмæ зæрдылдарæн æрмæджытæ.

Уыцы цауы фæдыл æмбырды архайдтой Цæгат Ирыстоны Парламенты Сæрдар Алексей Мачнев, Хицауады Сæрдар Тускъаты Таймураз, Парламент æмæ Хицауады уæнгтæ, республикæйы Мидхъуыддæгты министрады службæгæнджытæ министр Михаил Скоковы разамындæй, дины æмæ æхсæнадон организациты минæвæрттæ… Æмбырды кадджындæр уазджытæ уыдысты Фыдыбæстæйы Стыр хæсты архайджытæ æмæ мидхъуыддæгты оргæнты ветерантæ.

Зындгонд куыд у, афтæмæй патриотон-хъомыладон куысты мадзæлтты фæлгæты РЦИ-Аланийы Мидхъуыддæгты министрад æмæ республикæйы Ветеранты совет Цæгат Ирыстоны Сæргълæууæг Битарты Вячеславы æххуысæй мемориалон комплекс «Барбашовы фæз»-ы сæххæст кодтой, нæ республикæйы минæвæрттæй Фыдыбæстæйы Стыр хæсты хъæбатырæй чи хæцыд, уыдоны нæмттæ сæнусон кæныны проект «Стыр Уæлахизы фæлгонцтæ». Æмткæй райсгæйæ, уыцы ног экспозицийы ис 72 баннеры — алкæцыйыл дæр дзы ис хæсты архайджыты 100 хуызисты. Уымæй уæлдай, бынаты сæвæрдтой стыр экран æмæ интерактивон терминал. Фæзынд дзы, 180 æрбадæн бынаты кæм ис, ахæм зал гом арвы бын. Уыцы экраныл иудадзыгдæр æвдыст цæуынц Фыдыбæстæйы Стыр хæсты архайджыты хъæбатырдзинады тыххæй æрмæджытæ, стæй аивадон æмæ документалон кинонывтæ…

Кæй зæгъын æй хъæуы, ног экспозицимæ цы бирæ æрмæджытæ бахастой, уыдон бамбырд кæнынæн бахъуыд дзæвгар рæстæг. Æмæ уыцы ахсджиаг куыст сæхимæ райстой Мидхъуыддæгты министрад æмæ мидхъуыддæгты оргæнты Ветеранты совет — уыдон бабиноныг кодтой, республикæйы цæрджытæ сæм цы бирæ къамтæ æмæ æндæр æрмæджытæ фæхастой, уыдон.

Кадджын æмбырды йæ раныхасы Битарты Вячеслав арфæ ракодта, ног экспозици байгом кæныныл чи бакуыста, æппæт уыцы адæмæн.

— Æфсæддон-историон комплекс «Барбашовы фæз» куы фæзынд, уæдæй нырмæ ссис Цæгат Ирыстоны зынгæдæр номарæн мемориалтæй иу. Абон мах радон хатт стæм ам æмæ гом кæнæм ног хæстон экспозици. Гом арвы бын музейы æрмæджытæ зынгæ фæфылдæр æмæ фæхъæздыгдæр сты. Уыцы арфæйаг хъуыддаджы тыххæй сæрмагондæй бузныг зæгъын министр Михаил Скоковæн. Уый хъæппæрисджын архайды фæрцы фæзынд ног экспозици. Мæ хъуыдымæ гæсгæ, ахæм номарæн объекттæ ахадгæ сты рæзгæ фæлтæры æфсæддон-патриотон хъомыладон куысты. Уадз æмæ ног фæлтæртæ зоной се ‘мзæххонты хъæбатырдзинады хабæрттæ, хъомыл кæной уыдоны дæнцæгыл, — загъта Битарты Вячеслав.

Æмбырды раныхас кодтой иннæ кадджын уазджытæ дæр. Уыдон уыдысты æмхъуыды — уæлахизхæссæг фæлтæры хъæбатырдзинад æнустæм цæрдзæн нæ зæрдæты, уыдоны удуæлдайдзинад уыдзæн Фыдыбæстæйыл æнувыддзинады æвдисæн.

Уый фæстæ номарæн æмбырды архайджытæ æрзылдысты ног экспозицийыл, дидинджытæ æмæ дидинæгбæстытæ сæвæрдтой Петр Барбашов æмæ иннæ хæстонты цыртдзæвæнтыл.

 

РЦИ-Аланийы

Сæргълæууæджы æмæ Хицауады

пресс-службæ

 

ОСТАВЬТЕ ОТВЕТ

Please enter your comment!
Please enter your name here