Ног хæдтулгæтæ — тагъд медицинон æххуысы службæйæн

0
56

Цæгат Ирыстоны тагъд медицинон æххуысы службæйы техникон ифтонгдзинад хъомысджындæр кæны — ацы бонты республикæмæ сæрвыстой ног 11 хæдтулгæйы. Знон РЦИ-Аланийы Сæргълæууæг БИТАРТЫ Вячеслав кадджын уавæры уыцы хæдтулгæты дæгъæлтæ радта тагъд æххуысы службæйы шофыртæн.

Фæстаг æртæ азы дæргъы республикæйы тагъд медицинон æххуысы службæйæн лæвæрд æрцыд 72 хæдтулгæйы — афтæмæй къæпхæнгай зæронд машинæтæ раивтой ногтæй.   А-уалдзæг коронавирусы инфекци куы рапарахат, æмæ уæззау низимæ тохы хъуыддаджы æвæстиат мадзæлттæ аразын куы бахъуыд, уæд УФ-йы Хицауад уæлæмхасæн фæрæзтæ радих кодта «тагъд медицинон æххуысы» хæдтулгæтæ балхæнынæн. Æмæ ныр уыцы фæрæзтæй æлхæд хæдтулгæтæ республикæмæ схæццæ сты.

— Фæстаг цалдæр мæйы Тагъд медицинон æххуысы станцæйы кусджытыл уæлдай уæз æрæнцад коронавирусимæ тохы. Уæхи æдасдзинад æмæ æнæниздзинад ницæмæ даргæйæ, бæрнонæй æххæст кодтат æмæ дарддæр дæр æххæст кæнут уæ ахсджиаг куыст. Станцæйы коллективы æппæт уæнгтæн дæр зæрдиаг бузныг зæгъын, уæззау эпидемиологон уавæрты архайгæйæ, алкæддæр æххуысмæ цæттæ кæй стут, уый тыххæй, — загъта Битарты Вячеслав.

Республикæйы разамонæджы ныхасмæ гæсгæ, ног хæдтулгæтæ хорзæрдæм фæзындзысты республикæйы æнæниздзинад хъахъхъæнынады къабазы хъомысыл, зынгæ фæахадгæдæр кæндзысты тагъд медицинон æххуысы службæйы архайд. Алкæцы хæдтулгæйы дæр æвæрд ис æвæстиат медицинон æххуысы æппæты нырыккондæр ифтонггæрзтæ.

— Ныфс мæ ис, нырæй фæстæмæ, æвæстиат медицинон æххуысы телефон «03»-мæ бадзургæйæ, алкæцы адæймаг дæр афойнадыл ахадгæ медицинон æххуыс кæй исдзæн, уымæй, — йæ арфæйы ныхасы фæнысан кодта Битары-фырт.

Зæгъын хъæуы, Цæгат Ирыстоны æнæниздзинад хъахъхъæнынады кусæндæтты модернизаци æмæ нырыккон техникæйæ ифтонг кæныны мадзæлттæ коронавирусы инфекциимæ тохы уавæрты дæр дарддæр æххæстгонд кæй цæуынц, уый дæр. Афтæ, æрмæст фыццаградон национ проект «Æнæниздзинад»-ы фæлгæты республикæйы арæзт æмæ цалцæггонд цæуынц рынчындæттæ, амбулаторитæ æмæ фелсырон-акушерон пункттæ, уæрæхдæр кæны Сывæллæтты республикон клиникон рынчындоны инфраструктурæ, бæстондæр пайдагонд цæуы «фæстауæрцы куыстады» технологитæй, лыггонд цæуы кадртæй ифтонгады фарст.

ОСТАВЬТЕ ОТВЕТ

Please enter your comment!
Please enter your name here