Æргом — цæстдарды мадзæлттæм

0
31

Ацы бонты Цæгат Ирыстоны кусæг балцы уыд «Ространснадзор»-ы Цæгат Кавказы федералон зылды фæзуатон управленийы хицау Дмитрий КРАВЦОВ.

Федералон чиновникæн бирæ алыхуызон фембæлдтытæ уыд профилон республикон ведомствæтæ æмæ æндæр цæстдарæг оргæнты бæрнон кусджытимæ. Уым, кæй зæгъын æй хъæуы, бæстон ныхас рауад республикæйы транспорты къабазы дарддæры райрæзты фарстытыл.

Фæстаг цалдæр мæйы бæстæ, уыимæ, транспорты къабаз дæр, сæрмагонд эпидемиологон уавæрты кæй архайы, уыцы æууæл хынцгæйæ, федералон ведомствæйы минæвар сæрмагонд æргом аздæхта, республикæйы бæлццæттæласæг куыстуæттæ «Роспотребнадзор»-ы амынддзинæдтæ æмæ санитарон æдасдзинады домæнтæ куыд æххæст кæнынц, уымæ.

Уавæр бæстондæр сбæрæг кæныны нысанимæ Дмитрий Кравцов республикон ведомствæты бæрнон кусджытимæ архайдта сæрмагонд рейды дæр. «Ространснадзор» æмæ иннæ цæстдарæг оргæнты минæвæрттæ федтой транспортон фæрæзты уавæр, кæмæн хъуыд, уыцы транспортон компаниты разамындтæ æмæ шофыртæн радтой бæлвырд амынддзинæдтæ.

«Куыд иннæ цæгаткавказаг регионты, афтæ Цæгат Ирыстоны дæр «Ространснадзор»-ы республикон управлени æмæ иннæ цæстдарæг ведомствæты минæвæрттæ иудадзыгдæр бæрæг кæнынц транспортон компаниты куыст. Санитарон-эпидемиологон æдасдзинады домæнтæ халыны цаутæ куы рабæрæг кæнынц, уæд æппæт мадзæлттæй дæр бацархайынц, цæмæй æвæстиатæй иуварсгонд æрцæуой», — рейды фæстæ фæнысан кодта Дмитрий Кравцов.

Рейдон къорды уæнгтæ бабæрæг кодтой аэропорт «Дзæуджыхъæу» дæр. Фæстæдæр сæ хатдзæгты куыд фæнысан кодтой, афтæмæй санитарон æдасдзинады домæнтæ аэропорты аккаг хуызы æххæстгонд цæуынц.

Рейды архайджытæ уыдысты республикæйы промышленност æмæ транспорты министр Мæрзойты Владимир, «Ространснадзор»-ы цæгатирыстойнаг управленийы хицауы хæдивæг Мæхъиты Мурат æмæ æндæр ведомствæты минæвæрттæ.

 

Аннæ КАТОЛЬЯНЦ

ОСТАВЬТЕ ОТВЕТ

Please enter your comment!
Please enter your name here