Фидæны ныфсытæ 

0
26

Цæгат Ирыстоны Хетæгкаты Къостайы номыл паддзахадон университеты журналистикæйы факультеты кад кодтой сæ рауагъдонтæн. Æдæппæтæй дзы уæлдæр ахуырад райстой 13 студенты. Уыдонæй æхсæз ахуыр фесты иттæг хорз бæрæггæнæнтимæ, æмæ сын лæвæрд æрцыд «сырх» дипломтæ.

Фидæны журналисттæн арфæйы ныхæстæ загъта журналистикæйы факультеты декан Хæбæлаты Фатимæ:

— Цыппар азы размæ æрбакъахдзæф кодтат университеты къæсæрыл. Радтат фæлварæнтæ. Махæн тынг æхсызгон уыд уемæ кусын, цымыдисæй уын кастыстæм уæ нывæцæнтæ. Уым бæрæг уыд уæ дунембарынад, уæ зæрдæты ахаст æмæ уæ ахуыры цæттæдзинад. Уымæ гæсгæ, дызæрдыггаг нæ уыд, царды раст фæндаг кæй равзæрстат, уый. Уый та тынг ахсджиаг хъуыддаг у —  хъæугæ æмæ уарзон дæсныйад равзарын. Хъыгагæн, афтæ рауад, æмæ пандемийы аххосæй фæстаг рæстæг нæ бон фембæлын дæр нæ уыд. Фæлæ дæрддзæф ахуырады фæрцы нæ фæкъуылымпы уæ ахуыр. Размæ цæут уæндонæй, æмæ уæ къухы алцыдæр бафтдзæн.

Журналистикæйы кафедрæйы сæргълæууæг, педагогон наукæты кандидат, профессор Тедтойты Зинæ студенттæн бафæдзæхста, цæмæй сæ равзæрст дæсныйадыл сæ зæрдæ ма сивой æмæ дарддæр  сæ зонындзинæдтæ фылдæр кæной.

— Ахæм дзæбæх курс нæм журналистикæйы факультеты рагæй нал уыд. Цыппар азы цыппар бонау атахтысты, æмæ ныр нæ разы æрлæууыдысты цæттæ журналисттæ. Махæн нæ бон цы уыдис, уымæй сын ницы бавгъау кодтам, сæ дарддæры фæндаг та аразгæ уыдзæнис æрмæстдæр сæхицæй. Царды æмæ сæ сфæлдыстады ахизын бахъæудзæн фæлварæнты сæрты, æмæ сын уымæ гæсгæ мæ зæрдæ зæгъы æнæниз æмæ амондджын бонтæ. Уæхи æмæ уæ ныййарджыты фæндиаг ут! — ахæм арфæтæ студенттæн ракодта газет «Рæстдзинад»-ы сæйраг редактор Хозиты Барис.

Факультеты ахуыргæнджытæ сæ уарзон студенттæн бацæттæ кодтой зæрдылдарæн лæвæрттæ.

Æрыгон журналисттæн нæ зæрдæ зæгъы цардамонд æмæ стыр сфæлдыстадон æнтыстдзинæдтæ.

 

ХЪОЙБАЙТЫ Галинæ

Къам систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here