Республикон инвестицион программæмæ ивддзинæдтæ бахастой

0
61

ТУСКЪАТЫ Таймураз дзы сæрдариуæг кодта, афтæмæй уыд Республикæ Цæгат Ирыстон-Аланийы Хицауады радон æмбырд. Видеоконференцийы бастдзинады фæрцы министрадтæ æмæ ведомствæты разамонджытæ æркастысты республикæйы æрвылбоны царды ахсджиаг фарстытæм.

Хицауады æмбырды боны фæткмæ цы фарстытæ бахастой, уыдонæй сæйрагдæр уыд республикон нысанмæарæзт инвестицион программæмæ иуæй-иу ивддзинæдтæ бахæссын (2020 азæн, стæй 2021 æмæ 2022 азты пъланон æмгъуыдмæ).

Фарсты фæдыл раныхас кодта экономикон рæзты министр Томайты Хъазыбег. Йæ ныхасмæ гæсгæ, ивддзинæдты сæйраг хай баст у Дзæуджыхъæу æмæ республикæйы муниципалитетты саразинаг ахсджиаг социалон объектты æмæфсисады системæмæ бахæссын æмæ хъæугæ проектон-хынцæн документаци саразынимæ.

Афтæ, министры ныхасмæ гæсгæ, Дзæуджыхъæуы ног 500-бынатон скъолайы арæзтад кæронмæ ахæццæ кæнынæн федералон бюджетæй уæлæмхасæн дихгонд æрцыд 156 милуан сомы бæрц. Уыцы æууæл хынцгæйæ, республикæ æмæфсисады бындурыл уыцы æхцамæ бафтаудзæн 11 милуан сомы.

Дыууæ дзæуджыхъæуккаг æмæ æхсæз хъæууон рæвдауæндоны (арæзт цæудзысты Горæтгæрон, Дыгуры, Мæздæджы æмæ иннæ районты) проектон-хынцæн документаци бацæттæ кæнынæн хъæуы 15,5 милуан сомы бæрц, фондз культурæйы хæдзары æмæ дæс спортивон фæзы (арæзт цæудзысты Алагиры, Æрыдоны æмæ Мæздæджы районты) проектон-хынцæн документацийæн бахъæудзæн 5,6 милуан сомы бæрц. Кæнæ Мæздæджы районы Новогеоргиевскы æмæ Æрæфы районы Мæхческы фелсырон пунктты проектон документаци кæронмæ баххæст кæнынæн уæлæмхасæн нысангонд æрцæудзæн 660 мин сомы бæрц.

— 2020 азы республикон инвестицион программæмæ бахæссинаг ивддзинæдтæн фæрæзтæ дихгонд æрцæудзæн, программæйы уагæвæрдтæ æххæст кæнынæн рагагъоммæ кæй сфæстауæрц кодтой, уыцы æхцайæ. Уыцы æууæл нæ расайдзæн бюджетон инвестициты бæрц фæфылдæр кæныны хъуыддаг. Афтæ, ацы азæн инвестицион программæйы уагæвæрдтæ æххæст кæнынæн нысангонд æрцыд 393,2 милуан сомы. Уыимæ, фæстауæрцы фæрæзтæ нырма ис 677 мин сомы бæрц.

Фарстытыл æрныхас кæныны фæстæ Хицауады уæнгтæ сфидар кодтой инвестицион программæйы ивддзинæдтæ.

Дарддæр министртæ æрдзырдтой,сæрмагонд паддзахадон программæ «Цæгат Кавказы федералон зылды рæзт»-ы фæлгæты Рахизфарсы æмæ Горæтгæрон районты цы объекттæ фæзындзæн, уыдоны арæзтады фарстытыл. Куыд загъдæуыд, афтæмæй уыцы объектты номхыгъды сты ахсджиаг социалон æмæ коммуналон объекттæ. Уыдоны арæзтадæн федералон бюджет радих кæндзæн 690 милуан сомы бæрц.

— Уыцы программæйы фæлгæты зынгæ куыстытæ, зæгъæм, æххæстгонд æрцæудзæн Беслæны. Æмæ ныртæккæ сæйрагдæр у сфидар кæнын хъæугæ проектон-хынцæн документаци, цæмæй иуæй-иу объектты арæзтадæн æхца ацы аз дих кæнын райдайой, — хатдзæгтæ кæнгæйæ, загъта Тускъаты Таймураз.

Æмбырды архайджытæ æркастысты æндæр фарстытæм дæр.

 

РЦИ-Аланийы Сæргълæууæджы

æмæ Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here