Томайты Адӕйы сфӕлдыстадон ӕрмдзӕф

0
19

Паддзахадон телерадиокомпани «Алани”-йы азфысты ӕмӕ нӕ адӕмы зӕрдӕты йӕ ном ӕнусмӕ мысинагӕн кӕмӕн баззад, йӕ арф зонындзинӕдтӕй, йӕ курдиатӕй ӕмӕ зӕрдӕйы рӕдау ахастӕй йӕ дзыллӕйӕн стыр хӕрзты чи бацыд, уыцы арфӕйаг адӕймӕгтӕй иу уыд УФ-йы ӕмӕ РЦИ-Аланийы культурӕйы сгуыхт кусӕг,тележурналист ӕмӕ публицист Томайты Адӕ.

Уынд ӕмӕ конды, миддунейы ӕмӕ профессионалон курдиаты иудзинад. Уыдон уыдысты йӕ удыхъӕды сӕйрагдӕр ӕмӕ раппӕлинагдӕр миниуджытӕ. 40 азӕй фылдӕр зӕрдиаг ӕмӕ биноныг лӕггад фӕкодта Ирыстоны адӕмӕн. Уал азмӕ йӕ бон баци дӕсгай аивадон ӕмӕ ахуырадон, литературон равдыстытӕ бацӕттӕ кӕнын.

Фидӕны зындгонд журналист райгуырд 1940 азы, 2 сентябры, узбекаг горӕт Ферганайы. Йӕ фыд Барис (Бимболат) Фыдыбӕстӕйы Стыр хӕсты фыццаг бон ацыд нӕ бӕстӕ немыцаг лӕгсырдтӕй бахъахъхъӕнынмӕ ӕмӕ 1942 азы Смоленскы бынмӕ хъӕбатырӕй фӕмард. Адӕйы мад Тамарӕ, (Санаты чызг) уыд Ирыстоны зындгонд рухстауӕг, УСФСР-йы сгуыхт ахуыргӕнӕг, Ленины ордены кавалер.

Адӕ ахуыр кӕнынмӕ бацыд Дзӕуджыхъӕуы 3-ӕм астӕуккаг скъоламӕ. Хистӕр кълӕсты куы ахуыр кодта, уӕд рабӕрӕг литературӕмӕ йӕ уарзондзинад. Уыцы азты скъолайы къулы газеты рӕстӕгӕй-рӕстӕгмӕ мыхуыргонд цыдысты йӕ уацхъуыдтӕ, радзырдтӕ ӕмӕ ӕмдзӕвгӕтӕ. Ацы ахуырадон артдзӕсты бынӕттон радио куы сарӕзтой, уӕд Адӕ ссис йӕ уацхӕссӕг ӕмӕ диктор. 1958 азы скъола ӕнтыстджынӕй каст фӕуыны фӕстӕ Адӕ бацыд Мӕскуыйы М. В. Ломоносовы номыл паддзахадон университеты журналистикӕйы факультетмӕ. Райста дзы тележурналисты дӕсныйад. Уӕлдӕр скъолайы ахуыры рӕстӕг уыд, Мӕскуыйы чи ахуыр кодта, уыцы ирон фӕсивӕдӕй арӕзт хореографион ансамбл «Осса»-йы кафӕг. Йӕ разамонӕг та уыд фидӕны курдиатджын хореограф Тотойты Хъазыбег. Аивадон къорды уӕнгтӕ сӕ курдиат ӕвдыстой нӕ бӕстӕйы сӕйраг горӕты концертон фӕзты. Суанг ма 1961 азы Ирон литературӕ ӕмӕ аивады декадӕйы рӕстӕг, сӕрмагонд концерт радтой Колоннӕты залы. Мӕскуыйы ӕмӕ нӕ бӕстӕйы ӕндӕр горӕттӕй декадӕйы цы уазджытӕ уыд, уыдон ирон фӕсивӕды курдиатӕн стыр аргъ кӕй скодтой, уым уыд Адӕйы сгуыхт дӕр.

1963 азы Адӕ университет каст куы фӕци ӕмӕ Ирыстонмӕ куы ссыди, уӕдӕй йӕ царды фӕстаг бонтӕм фӕкуыста Цӕгат Ирыстоны телеуынынад «Алани”-йы. Адӕмы зӕрдӕтӕм фӕндаг ссардтой йӕ телевизион ахадгӕ проекттӕ «Фӕсивӕды телевизион клуб», «Мы в ответе за юность», «Актуалон камерӕ». Ацы проекттӕй ӕртӕ равдыстой ӕппӕтцӕдисон центрон телеуынынадӕй. Йӕ равдыстыты уазджытӕ-иу кӕддӕриддӕр уыдысты алы кары ӕмӕ алы дӕсныйӕдтыл хӕст адӕм. Се ‘ппӕтимӕ дӕр Адӕ эфиры ныхас кодта ӕргом ӕмӕ зӕрдӕхӕларӕй, йӕ равдыстыты алы архайӕг царды цы куыстыл хӕст у, уымӕй уӕлдай ма йӕ зӕрдӕйы цы курдиат ӕмӕ арӕхстдзинады зынг судзы, ӕппӕт уыцы миниуджытӕ-иу афтӕ арӕхстджынӕй рахаста адӕмы размӕ, ӕмӕ-иу, чи йӕм касти, уыцы адӕймагӕн дӕр уарзон ӕмӕ зынаргъ ссис.

Рацарӕзты азты адӕймаджы рӕсугъд миниуджытӕм фаг ӕргом здӕхт куы нал уыд, уӕд Адӕ йӕ рухстауӕн архайд ноджы фӕпарахатдӕр кодта. 90-ӕм азты паддзахадон телерадиокомпани «Алани»-йы эфиры фӕзындысты ӕмӕ адӕмӕн уарзон систы йӕ проекттӕ: «Престиж», «Святая верность дарованию», «Автограф». Йӕ фӕрцы, номдзыд уырыссаг поэт Пушкины ӕмӕ Иры уарзон хъӕбул Хетӕгкаты Къостайы юбилейтӕм нӕ интеллигенцийы раззагдӕр минӕвӕрттӕ журналисттӕ, артисттӕ, зарӕггӕнджытӕ кастысты ацы ӕрдхӕрӕны дзырдаивады дӕсныты ӕмдзӕвгӕтӕ, зарыдысты сӕ ныхӕстыл фыст романстӕ, куыд уырыссаг, афтӕ ирон ӕвзагыл дӕр.

Куыд ирон сылгоймаг ӕмӕ профессионалон тележурналист, афтӕ Адӕ уыд стыр мидкультурӕйы хицау, зыдта ӕгъдауыл ныхас кӕнын эфиры бӕрнон бынӕтты кусӕг хицауады минӕвӕрттимӕ, хистӕр, астӕуккаг кары ӕмӕ кӕстӕр фӕсивӕдимӕ дӕр. Йӕ бирӕвӕрсыг зонындзинӕдтӕй рӕдау хай кодта, тележурналистикӕйы фыццаг къахдзӕфтӕ чи кодта, уыцы суинаг курдиатджын фӕсивӕдӕн.

— Ивгъуыд азты нӕ республикӕйы Журналистты цӕдисы уыд хорз хъӕппӕрис. Уыцы организаци-иу сӕрмагондӕй бацархайдта ууыл, цӕмӕй курдиатджын фӕсивӕд журналистикӕйы дӕсныйад райсой Мӕскуыйы ӕмӕ Бетъырбухы паддзахадон университетты. Афтӕ, 60 азты, профессионалон журналистикӕйӕ хорз, фидар зонындзинӕдтӕ чи райста, уыцы журналисттӕ уыдысты ӕртӕ — Цӕллагты Валодя, Салхъазанты Фатимӕ ӕмӕ Томайты Адӕ, — дзырдта мын газет «Рӕстдзинад»-ы сӕйраг редактор, литературӕиртасӕг, культуролог Хозиты Барис, — Ирыстоны паддзахадон телеуынынады дзы фыццагдӕр Адӕ райдыдта кусын. Ӕмӕ йын се ‘ппӕт дӕр уыдысты бӕрзонд профессионалон ӕмвӕзадыл арӕзт. Ӕз дӕр йӕ дыууӕ равдысты («Престиж» ӕмӕ «Святая верность дарованию») куыд уазӕг, афтӕ архайдтон. Ӕмӕ йемӕ эфиры тынг ӕнцон кусӕн уыди. Равдыстытӕ фыст куы фестӕм, уӕд мын иу хатт афтӕ зӕгъы: «Кӕд дӕм мӕ равдыстытӕм исты фиппаинӕгтӕ ис, уӕд мын сӕ зӕгъ. “ӕз ын сӕ загътон. Раст зӕгъын хъӕуы, комкоммӕ йе сфӕлдыстадон куыстмӕ нӕ, фӕлӕ равдыстыты оператортӕм хаудтой, фӕлӕ сӕ уӕддӕр цыбыр рӕстӕгмӕ сраст кӕнын кодта. Уӕдӕ йӕ равдыстытӕ адӕмы зӕрдӕмӕ куыд тынг цӕуынц, уый уыдтон, ӕмӕ йын мӕ хъуыды загътон, цӕмӕй, сӕрмагондӕй телеравдыст «Престиж»-ы цы кадджын уазджытӕ вӕййы, уыдоны интервьютӕй сӕйрагдӕртыл кӕй нымайы, уыдонӕй хицӕн чиныг сараза. Ӕмӕ мӕ фӕндоныл сразы. Ныр уыцы чиныгӕй ӕхсызгонӕй пайда кӕнынц, куыд фӕлтӕрдджын, афтӕ суинаг журналисттӕ ӕмӕ культурологтӕ. Ӕмӕ ма Адӕйӕн йӕ миддунейы рӕсугъддзинады тыххӕй дзурӕг иу хабары тыххӕй ӕнӕ зӕгъгӕ нӕй. ЦИПУ-йы журналистикӕйы кафедрӕйы сӕргъы куы ӕрлӕууыдтӕн, уӕд уырдӕм кусынмӕ кӕй ӕрбахонӕм, зӕгъгӕ, ирон филологийы факультеты раздӕры декан Къомайты Риммӕимӕ куы ахъуыды кодтам, уӕд, фыццаджы-фыццагдӕр, нӕ зӕрдыл чи ӕрлӕууыд, уыцы фӕлтӕрдджын журналисттӕй сӕ иу уыд Адӕ. Йемӕ кафедрӕйы фӕныхас кодтам, фӕлӕ Адӕ кафедрӕйы кусынмӕ не сразы, телеуынынады ӕмӕ сфӕлдыстадон хъуыддаджы йӕ размӕ бирӕ хӕстӕ кӕй лӕууыд, уымӕ гӕсгӕ. Фӕлӕ, уыйхыгъд, йӕ бирӕвӕрсыг зонындзинӕдтӕй рӕдау хай кодта, телеуынынады-иу практикӕйы чи уыд, уыцы суинаг журналисттӕн. Ирыстоны тележурналистикӕйы, мӕнӕ телехид кӕй хонынц, уыцы жанры дӕр фыццагдӕр Адӕ архайын райдыдта. Нӕ бӕстӕйы алы горӕтты не ‘мбӕстӕгтӕй цы зындгонд адӕм цӕры, уыдон-иу, ахӕм хуызы зонгӕ кодта се ‘нтыстытимӕ ӕмӕ сгуыхтдзинӕдтимӕ. Куыд поэт ӕмӕ сывӕллӕттӕн фыст радзырдты автор, афтӕ йӕ уацмыстыл дӕр зынд, йӕ Ирыстон, йӕ адӕмы зӕрдиагӕй кӕй уарзы, хорзы бацӕуынмӕ сын зӕрдиагӕй кӕй тырны, уыцы ӕвӕджиауы равг ӕмӕ хъуыды.

Йӕ цардӕмбал Кцойты Валодя дӕр уыд курдиатджын нывгӕнӕг. Йӕ аивадон куыстытӕ ӕфснайд сты Ирыстоны музейты ӕмӕ хицӕн адӕймӕгты ӕвӕрӕнты. Йӕ проектмӕ гӕсгӕ йӕ рӕстӕджы Дагестаны арӕзт ӕрцыд номдзыд поэт Гамзат Цадасайы музей.

Адӕ ӕмӕ Валодя схъомыл кодтой фӕзминаг цот. Сӕ лӕппу Азӕмӕт у курдиатджын нывгӕнӕг. Чызг Дзерассӕ та — нӕ бӕстӕйы ӕмӕ нӕ республикӕйы хуыздӕр журналисттӕй иу.

Адӕ кӕд фылдӕр уырыссаг ӕвзагыл арӕзта йӕ равдыстытӕ, уӕддӕр йӕ зӕрдӕйы фидар бынат уыд йӕ мадӕлон ӕвзагӕн. Хорз ӕй кӕй зыдта ӕмӕ йыл ӕдӕрсгӕ кӕй дзырдта, ууыл дзурӕг у уый, ӕмӕ иронау сӕрмагонд равдыстытӕ кӕй сарӕзта нӕ аивады ӕмӕ литературӕйы зиууӕттӕ — Гӕбуты Зояйыл, Гуыриаты Розӕйыл, Хӕмыцаты Албегыл. Уырыссагау-иу цы равдыстытӕ амыдта, уым-иу йӕ архайджытӕй искӕй иронау йӕ хъуыдытӕ раргом кӕнын куы фӕндыд, уӕддӕр-иу ӕй нӕ къуылымпы кодта.

Адӕ канд дӕсны журналист нӕ уыд, фӕлӕ ма фыста зӕрдӕмӕдзӕугӕ ӕмдзӕвгӕтӕ, радзырдтӕ, аивадон-публицистикон очерктӕ. Адӕм-иу ын сӕ ӕхсызгонӕй кастысты нӕ республикӕйы ӕмӕ ма суанг нӕ бӕстӕйы центрон газетты ӕмӕ журналты дӕр.

Алы азты республикӕйы паддзахадон рауагъдад «Ир»-ы ӕмӕ Гасситы Викторы номыл полиграфион куыстуаты рацыдысты йӕ поэтикон, прозаикон ӕмӕ публицистон чингуытӕ: «Дыккаг уарзт», «Мӕ хӕлар, ахуыргӕнӕг», «Тигрята шагают за облака», «ӕууӕндын дыл, удцырын», «Послушайте», «Благослави», «Ночной клавесин», «Дева — Осень», «Моя эфирная зона»…

Томайты Адӕ журналистикӕмӕ ӕмӕ аивадон литературӕмӕ аккаг ӕвӕрӕн кӕй бахаста, уый тыххӕй йын саккаг кодтой РЦИ-Аланийы адӕмон поэты, Гӕздӕнты ӕфсымӕрты ӕмӕ ӕмбалты Цоцкойы номыл премитӕ, «Советон Цӕдисы телеуынынад ӕмӕ радиойы отличник»-ы кадджын нӕмттӕ. Адӕ уыд УФ-йы Журналистты ӕмӕ Фысджыты цӕдисты уӕнг, УФ-йы ӕмӕ РЦИ-Аланийы культурӕйы сгуыхт кусӕг.

Ирыстоны фыццаг профессионалон тележурналист, курдиатджын поэт, прозаик ӕмӕ публицист, цӕстуарзон хистӕр, фӕлмӕн ныййарӕг ӕмӕ нана.

Томайты Адӕ кӕд не ‘хсӕн нал ис, уӕддӕр, йӕ фӕстӕ цы сфӕлдыстадон бынтӕ ныууагъта, уыдоны фӕрцы йӕ ном рохуаты никуы уыдзӕн…

Гасанты Валери

ОСТАВЬТЕ ОТВЕТ

Please enter your comment!
Please enter your name here