Нӕ сӕртӕй уын ныллӕг кувӕм

0
63

Ивгъуыд сабаты спорты галуан «Манеж»-ы уыд ӕхсызгон цау. РЦИ-Аланийы Сӕргълӕууӕг БИТАРТЫ Вячеслав республикӕйы хӕрзиуджытӕ радта, карз низ — коронавирусы ныхмӕ архайыны рӕстӕг тынгдӕр чи фесгуыхт ӕмӕ уӕлдай лӕгдзинад чи равдыста, уыцы дохтыртӕ ӕмӕ медицинон кусджытӕн.

Аккагдӕрты схорзӕхджын кӕныны хъӕппӕрис равдыста Битарты Вячеслав йӕхӕдӕг ӕмӕ, уыцы бон галуаны чи ӕрӕмбырд, республикӕйы медицинон ӕхсӕнады уыцы хуыздӕр минӕвӕрттӕн арфӕ кӕнгӕйӕ, загъта:

— Нӕ сӕртӕй уын ныллӕг кувӕм, ацы цъаммар низӕй адӕмы кӕй аирвӕзын кодтат, ӕхсӕв бон нӕ хынцгӕйӕ, йӕ ныхмӕ стыр разӕнгардӕй кӕй архайдтат ӕмӕ абон дӕр кӕй архайут, уый тыххӕй. Ӕппӕты фыццаг, Тагъд ӕххуысы клиникон рынчындон, стӕй Республикон клиникон рынчындон ӕмӕ сӕ фӕстӕ иннӕ медицинон кусӕндӕттӕ дӕр хӕрзцыбыр рӕстӕгмӕ сӕ куысты уавӕртӕ рацарӕзтой, ацы низӕй уӕззау рынчынтӕн ӕккаг медицинон ӕххуыс цӕмӕй уа, уый тыххӕй. Ӕмӕ фыццаг бонты хъуыддӕгтӕ кӕд бынтон зӕрдӕмӕдзӕугӕ нӕ цыдысты, рынчынтӕ ӕгӕр бирӕ кӕй уыд, уымӕ гӕсгӕ, уӕддӕр куыдфӕстӕмӕ нӕ дохтыртӕ ӕмӕ медицинон кусджытӕ, республикӕйы оперативон штабы дӕсны разамындӕй, низыл уӕлахиз кӕнын райдыдтой ӕмӕ уавӕр нывыл кӕнын райдыдта. Стыр бузныг уын уе ‘нӕкӕрон лӕгдзинады тыххӕй. Алчидӕр уӕ у стыр хӕрзиуӕджы аккаг, фӕлӕ, уӕ профессионалон хӕс ӕххӕст кӕнгӕйӕ, сымах цы лӕгдзинад равдыстат, уымӕн абарӕн ницӕимӕ ис ӕмӕ йын аккаг аргъ скӕнӕн дӕр нӕй. Уӕлдай арфӕ кӕнын, не ‘рыгон фӕлтӕрӕн — медицинон колледжы ӕмӕ паддзахадон медицинон академийы студенттӕн, волонтертӕн. Хӕрзиуджытӕн, лӕвар ординатурӕтӕн ӕмӕ ӕндӕр зӕрдӕлхӕнӕнтӕн сӕ кой дӕр нӕма уыд, афтӕмӕй уыдон разӕнгардӕй балӕууыдысты сӕ хистӕрты фарсмӕ ӕмӕ семӕ ӕмгуыст кодтой.

Уый фӕстӕ, галуаны чи ӕрӕмбырд, уыцы адӕм, иу минут ӕдзӕмӕй алӕугӕйӕ, ссардтой, йӕ куысты уӕлхъус, йӕ хӕстӕ ӕххӕст кӕнгӕйӕ ӕмӕ дзы рынчынты ацы ӕвирхъау низӕй дзӕбӕх кӕнгӕйӕ, йӕхӕдӕг низы аххосӕй чи фӕмард, уыцы дохтыртӕ ӕмӕ медицинон кусджыты рухс нӕмттӕ.

Республикӕйы Сӕргълӕууӕджы Указӕй, коронавирусы ныхмӕ архайыны хъуыддаджы уӕлдай стырдӕр баварӕн кӕй бахастой, уый тыххӕй республикӕйы бӕрзонддӕр хӕрзиуӕг — «Республикӕ Цӕгат Ирыстон-Аланийы Фӕллойы Хъӕбатыр»-ы ном лӕвӕрд ӕрцыд Тагъд ӕххуысы клиникон рынчындоны дохтыр-реаниматолог Быценты Роланд ӕмӕ Цӕгат Кавказы бирӕкъабазджын медицинон центры хайады сӕргълӕууӕг Дойаты Денисӕн.

Орден «Ирыстоны намыс» лӕвӕрд ӕрцыд Республикӕйы сывӕллӕтты клиникон рынчындоны сӕйраг дохтыр Икъаты Мурат ӕмӕ республикӕйы ӕнӕниздзинад хъахъхъӕнынады министрады сӕйраг ӕнӕштатон пульмонолог Болиаты Лаурӕйӕн.

Майдан «Ирыстоны намыс”-ӕн лӕвӕрд ӕрцыд: тагъд медицинон ӕххуысы дохтыр Ӕлборты Альбинӕйӕн, Тагъд ӕххуысы клиникон рынчындоны диагностикӕйы хайады сӕргълӕууӕг ӕгъуызарты Фатимӕйӕн, Пульмонологон ӕххуысы республикон центры дохтыр-пульмонологтӕ Беккуызарты Фатимӕ ӕмӕ Гаджиты Аланӕн, Республикон клиникон рынчындоны хайады сӕргълӕууӕг Бицъоты Барисӕн, Сывӕллӕтты республикон клиникон рынчындоны сӕйраг дохтыры хӕдивӕг Гӕздӕнты Аллӕйӕн, Тагъд ӕххуысы клиникон рынчындоны дохтыр-анестезиолог-реаниматолог Дзӕгъойты Жаннӕйӕн, Республикон клиникон рынчындоны анестезиологи-реаниматологийы хайады сӕргълӕууӕг Майрӕнсауты Галинӕйӕн, Тагъд ӕххуысы клиникон рынчындоны анестезиологи-реаниматологийы хайады хистӕр медицинон хо Дзугаты Джульеттӕйӕн, Республикон клиникон рынчындоны хайады сӕргълӕууӕг Тетцойты Георгийӕн, РЦИ-Аланийы “Роспотребнадзор”-ы сӕргълӕууӕг Тыбылты Аланӕн, астӕуккаг медицинон кусӕг, Цӕгат Ирыстоны паддзахадон медицинон академийы студент Уыртаты Асланӕн, Цӕгат Кавказы бирӕкъабазджын медицинон центры сӕйраг дохтыр Уыртаты Ролан ӕмӕ ацы центры дохтыр-анестезиолог-реаниматолог Хосонты Ацӕмӕзӕн.

Уый фӕстӕ дохтыртӕ ӕмӕ медицинон кусджытӕн арфӕ ракодта республикӕйы Парламенты Сӕрдар Алексей Мачнев. «РЦИ-Аланийы сгуыхт дохтыр»-ы кадджын ном лӕвӕрд ӕрцыд республикӕйы Хицауады Сӕрдары хӕдивӕг, ӕнӕниздзинад хъахъхъӕнынады министр Годжыцаты Тамерланӕн, «РЦИ-Аланийы ӕнӕниздзинад хъахъхъӕнынады сгуыхт кусӕджы» ном та — РЦИ-Аланийы гигиенӕ ӕмӕ эпидемиологийы дохтыр Бутаты Алыксандрӕн.

Нӕ медицинон ӕхсӕнады хуыздӕр минӕвӕрттӕн арфӕ ракодта горӕт Дзӕуджыхъӕуы администрацийы сӕргълӕууӕг Икъаты Русланбег дӕр. Горӕты 1-ӕм, 4-ӕм ӕмӕ 7-ӕм поликлиникӕты, стӕй республикӕйы Алагиры, Рахизфарсы, Ӕрӕфы, Ӕрыдоны, Дыгуры, Горӕтгӕрон ӕмӕ Кировы районты рынчындӕтты кусӕг дохтыртӕ ӕмӕ медицинон кусджытӕй пандемийы рӕстӕг йӕхи уӕлдай арфӕйагдӕрӕй чи равдыста, уыдонӕн лӕвӕрд ӕрцыд Республикӕ Цӕгат Ирыстон-Аланийы Кады грамотӕтӕ. Уыдонӕн сӕ номхыгъдтӕ арфӕтимӕ Икъаты Русланбег алӕвӕрдта уыцы медицинон кусӕндӕтты сӕйраг дохтыртӕм.

Ног низӕфтауӕг фӕстаг рӕстӕг не ‘ппӕты дӕр зындзинӕдты сӕрты ахизын кодта, ӕмӕ, урс халат йе ‘рвылбоны дарӕсӕн чи равзӕрста, уыцы адӕммӕ нӕ бынтон ӕндӕр цӕстӕй акӕсын кодта. Уымӕн ирд цӕвиттон — ацы ӕхсызгон цау.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here