«Уырыссӕгтӕ нӕ касӕй фӕхынцтой»

0
14

Алы аз дӕр Уӕлахизы бӕрӕгбоны размӕ ныгуылӕйнаг бӕстӕты дзыллон информацийы фӕрӕзтӕ арӕхдӕр райдайынц мыхуыр кӕнын советон салдӕтты хъӕддаг миты тыххӕй ӕрмӕджытӕ. Германыл, дам, куы фӕуӕлахиз сты, уӕд, дам, сӕхи хорз нӕ дардтой. Фӕлӕ 1945 азы уалдзӕджы ӕмӕ сӕрды цаутӕ кӕй зӕрдыл лӕууынц, уыдон та ӕндӕр ныхӕстӕ кӕнынц.

84-аздзыд австриаг профессор Адольф Зильберштайн нӕ уарзы йӕ ном ӕмӕ йӕхи хонын кӕны Абси. «Афтӕ рауад хъуыддаг, — дзуры профессор, — мӕ ныййарджытӕ цӕмӕй зыдтой, мӕ райгуырдӕй цалдӕр азы фӕстӕ нӕ бӕстӕйы цы хабӕрттӕ ‘рцӕудзӕн, уый». 1938 азы Гитлер ӕрбаиу кодта Австри Германмӕ, ӕмӕ дыууӕаздзыд сывӕллоны царды ӕрцыд ивддзинӕдтӕ: чысыл Адольфы фыд уыдис немыцаг, мад та — дзуттаг. Рейхы закъонтӕм гӕсгӕ сывӕллон нымад цыдис ӕмбистугоныл. «Ариаг расӕйы сыгъдӕгдзинад» нӕ бахъахъхъӕныны тыххӕй фыды арвыстой фронтмӕ ӕмӕ уым фӕмард 1943 азы. Сывӕллоны мад ӕмӕ бабуйы арвыстой концлагер Малый Тростенецмӕ Белоруссимӕ, ӕмӕ уым фыццаг бон газы камерӕйы амӕттаг фесты. Гыццыл сывӕллоны моладзан-сылгоймӕгтӕ бамбӕхстой. Лӕппу рагацау бахъомыл. Алы бон дӕр ӕнхъӕлмӕ каст гестапойы кусджытӕм, тарст, акӕндзысты йӕ, кӕцӕй нал раздӕхдзӕн, уырдӕм.

1945 азы феврал ӕмӕ мартъийы Венӕйыл бомбӕтӕ калдтой цӕдисонтӕ, сывӕллӕтты ӕрцӕрын кодтой сӕ хистӕртӕ пъадвалты. Апрелы горӕтмӕ бырсын райдыдтой советон ӕфсӕдтӕ. Абси хъуыды кӕны, горӕт ссӕрибар кӕныны фӕстӕ цыппар мӕйы дӕргъы пъадвалӕй фыццаг хатт куыд схызт, уый. Ӕддӕмӕ куы рахызт, уӕд федтой уынгты цӕуӕг Сырх ӕфсады хӕйтты. «Уӕ салдӕттӕй мӕм иу фӕдзырдта ӕмӕ мын мӕ къухы сӕнӕфсиры хустӕ ӕркодта. Ӕз уымӕй размӕ ахӕмтӕ никуы хордтон! Венӕмӕ уырыссӕгтӕ кӕй ӕрбацыдысты, уый ӕхсызгон уыд не ‘ппӕтӕн дӕр. Ӕз рагӕй бӕллыдтӕн, цӕмӕй нӕм сырхӕфсӕддонтӕ фӕзыной тагъддӕр ӕмӕ нӕ фервӕзын кӕной мӕлӕтӕй».

Фӕстаг азты ныгуылӕйнаг дзыллон хабархӕссӕг фӕрӕзты арӕх фыссынц, Сырх ӕфсад, дам, Германы фӕзуатыл кодта ӕрмӕстдӕр судзгӕ, тыхми ӕмӕ маргӕ. Уӕлахизы 75 азы бӕрӕгбоны хӕдразмӕ мах ныхас кодтам, 1945 азы май-июны цаутӕ чи хъуыды кӕны, ахӕм немыцӕгтимӕ. Мӕнӕ цы зӕгъы Германы Демократон Республикӕйы хицауады раздӕры сӕргълӕууӕг 92-аздзыд Ханс Модров:

— Ӕвддӕс азы мыл цыдис, нацистон Германы адӕмон хӕдӕфсадмӕ мӕм куы ӕрсидтысты, уӕд. Ӕз уыдтӕн ӕрыгон фашист, ӕууӕндыдтӕн Гитлерыл. Нӕ амондӕн, майы нӕ гарнизон йӕхи радта ӕнӕ схӕцгӕйӕ, ӕмӕ мӕн арвыстой уацайрӕгты лагермӕ поселок Боровкӕмӕ, Мӕскуыйӕ 20 километры ӕддӕдӕр. Немыцаг афицертӕн суанг уацары дӕр ӕвзӕр ахаст уыд рӕнхъон салдӕттӕм. Советон ӕфсӕддонты, карджын нӕлгоймӕгты ‘рдыгӕй та нӕм уыдис хъарм, раттӕг фыды ахастдзинад. Комкоммӕ уацары уӕвгӕйӕ, бамбӕрстон: нацистон идеологи уырыссӕгты ӕххӕст адӕймӕгтыл кӕй нӕ нымайы, уымӕн ӕцӕгдзинадимӕ иумӕйагӕй ницы ис. Ӕз базыдтон, милуангай адӕймӕгтӕ кӕм бабын сты, уыцы удмарӕн лагерты тыххӕй».

1952 азы Модров уыдис Ленинграды, федта блокадӕйы ӕбуалгъ фӕстиуджытӕ, Петергофы хӕлд галуан. Уыд Мӕскуыйы бынмӕ дӕр, федта, нацисттӕ кӕй басыгътой, уыцы горӕттӕ. «Ахӕм ӕвирхъау хабӕрттӕн ферохгӕнӕн нӕй, — зӕгъы Ханс. — Советон салдӕттӕ уыйас зиантӕ не ‘рхастой Германӕн Советон Цӕдисӕн немыцаг ӕфсад цас ӕвирхъау митӕ бакодта».

— 1945 азы мӕныл цыдис 8 азы, — зӕгъы Германы Демократион Республикӕйы фӕстаг генсек, ныр пенсиисӕг Эгон Кренц, — ӕмӕ ӕз иунӕг хатт дӕр уырыссӕгты хъӕддаг митӕ кӕнгӕ никуы федтон. Куыддӕр Советон ӕфсад Берлинмӕ бацыд, афтӕ салдӕттӕ ӕрбалӕууын кодтой быдырон къухнӕтӕ ӕмӕ нӕ горӕты цӕрджытӕ рады лӕууыдысты тӕвд касмӕ. Чи зоны, ӕндӕр рӕтты афтӕ нӕ уыд, быцӕу нӕ кӕндзынӕн, фӕлӕ ӕз мӕхи цӕстӕй цы федтон, уый кой кӕнын».

Уӕдӕ афтӕ, кӕимӕ ныхас кодтон, уыцы хистӕртӕй иу дӕр нӕ хъуыды кӕны ӕмӕ Сырх ӕфсад сабыр цӕрӕг адӕмы бирӕгӕйттӕй марой ӕмӕ сын тыхмитӕ кӕной. О, хӕсты алцыдӕр кӕй вӕййы, уый ӕцӕг у. Ууыл чи нӕ сӕтты, уый ӕнӕмбаргӕ у, уӕлдайдӕр, ССР Цӕдисы фӕзуатыл нацисттӕ цы фыдфынтӕ фенын кодтой адӕмӕн, уый фӕстӕ. Фӕлӕ кӕй бафарстон, уыдон иттӕг хорз хъуыды кӕнынц, цӕдисонты авиаци бомбӕтӕй немыцаг горӕтты кварталты куыд ныддӕрӕн кодта, рыг сӕ куыд фестын кодта, уый, ныгуылӕйнаг историктӕ, уӕлдайдӕр англисаг ӕмӕ америкаг историктӕ афтӕ арӕх кӕй тыххӕй фыссынц, Сырх ӕфсады уыцы «фыдракӕндтӕ» сӕ иуы зӕрдыл дӕр нӕ лӕууынц. Уый цӕуыл дзурӕг у? Уый дзурӕг у, Ныгуылӕны хӕсты истори фендӕрхуызоныл хъӕддыхӕй кӕй архайынц, ууыл. Ницы сын дзы рауайдзӕн! Уӕлахиз мах у, ӕрмӕстдӕр мах, Уӕрӕсейы ӕмӕ раздӕры ССР Цӕдисы республикӕты! Уымӕн ӕмӕ уыдон минӕвӕрттӕ уыдысты, фашизм йӕ ахстоны чи ныцъцъист кодта, уыцы Советон ӕфсады рӕнхъыты.

Георгий Зотов, Берлин.

Ӕрмӕг бацӕттӕ кодта Багаты Аврам

ОСТАВЬТЕ ОТВЕТ

Please enter your comment!
Please enter your name here