Джусойты Мураты фӕлгонц

0
64

Ӕртын азы фӕстӕ

Кинорежиссер ӕмӕ сценарист Джусойты Мураты сфӕлдыстады тыххӕй афӕлгӕстӕн ӕз ахӕм ном райстон алтайаг журналист Ростислав Бардокины блогӕй. Уый Мураты тыххӕй афтӕ фыссы: » Мурат, рацыд 30 азы, фӕлӕ дӕ ист кинонывтӕ уӕддӕр сты критикты ныхасы сӕр». Уымӕ гӕсгӕ та мӕ афтӕ зӕгъын фӕнды, классикы царды, уый у, чи ӕмбӕлы, ахӕм хъуыддаг. Кинонывтӕ ӕвзӕрст цӕуынц, цал профессионалон цӕстӕнгасы сӕм ис, стӕй сӕм цымыдис цал адӕймаджы кӕны, уыйас. Кӕд Мурат цалдӕр кинонывы йеддӕмӕ нӕ систа, уӕддӕр ӕй, цӕмӕй классик схонӕм, уымӕн ис бындурон ӕфсон. Уыцы ном та бакуыста, ӕппӕты фыццаг, йӕ адӕмӕн лӕггад кӕнгӕйӕ, кӕд ууыл йӕхӕдӕг никуы хъуыды кодта, уӕддӕр.

Чысыл ирон хӕххон хъӕуы  кинонывмӕ  куы бакаст чысыл Мурат, уӕд цымӕ цӕуыл хъуыды кодта, дунембарынадмӕ йын йӕхи фӕндаг куы байгом, уӕд.  Урс кӕрдӕн цы сарайы къулыл ӕмбӕрзт уыд, уым цы советон киноныв федта, уый йыл цымӕ цавӕр уӕлмонц базыртӕ басагъта.  Уыцы ӕнахуыр уаг сывӕллоны миддунейы фӕзынд, номдзыд кинорежиссер Юлий Райзманы ист киноныв «Коммунист»-мӕ 1957 азы  куы бакаст, уӕд. Мурат ацы кинонывы тыххӕй йе ‘нкъарӕнтӕ куы дзырдта, уӕд бӕрӕг уыд, уымӕй цы  банкъардта, уыцы ӕнкъарӕнтӕ кӕй нӕ фесӕфта, фӕлӕ сӕ хӕзнайау йӕ риуы арф кӕй бамбӕхста, уый.  Нӕ фӕлӕ ма, уыцы диссаджы ӕнкъарӕн лӕвар кӕнын- хъом сси йӕхӕдӕг: «Ахъуыды-ма кӕн, амарынц ӕй (Евгений Урбанскийы хъайтары), ӕмӕ хъуамӕ амӕла, уый та ма уӕддӕр  сысты ӕмӕ рацӕуы йе ‘знӕгтӕм, мардӕй дӕр дзы уыдон ӕмризӕджы ризынц”.

Ам ахъуыдыгӕнӕн уаид, цавӕр кинематографион матрицӕтыл фидар кӕна хъуамӕ  фидӕны нӕлгоймаджы хъуыдыкӕнынад. Фӕлӕ бӕлвырд у иу хъуыддаг, киноныв феныны фӕстӕ Мурат йӕ хӕдзармӕ иунӕгӕй кӕй не ‘рбацыд: йӕ уды райгуырд бӕллиц. ӕмӕ йӕ ныр бамбӕрста, уый йӕ йӕ царды дарддӕры фӕндӕгтыл кӕй хондзӕн, уый. ӕмӕ хуымӕтӕг хуызы нӕ цыд йӕ нысанмӕ, фӕлӕ уал ахуыр кӕнынмӕ бацыд ЦИПУ-йы физикон хъомылады, стӕй та — Цӕгат Кавказы хӕххон-металлургон институты электро-механикон факультетмӕ (йӕ ахуыр дзы иуы дӕр кӕронмӕ нӕ ахӕццӕ кодта). Каст фӕци Кинематографийы ӕппӕтцӕдисон институты экономикон факультет. Киноаивады ӕппӕт лыстӕг хъуыддӕгтӕ базонгӕйӕ, Советон ӕфсады рӕнхъыты баслужбӕйы фӕстӕ ӕрбацыд Одессӕйы киностудимӕ. Уыд уал кинонывы директор. Ӕцӕгӕлон адӕмы проекттӕ царды уадзын зыдта, фӕлӕ дзы киноаивад агуырдта, хи фӕндаг айгӕрдын. Уымӕй та йын фӕуыдаид, киноаивады хи ныхас зӕгъыны ӕмӕ йӕ адӕммӕ фӕхӕццӕ кӕнынӕн фадат.

Джусойты Мурат Одессӕйы киностудийы цы рӕстӕг куыста, уый тыххӕй бирӕ ӕрмӕджытӕ фыст ӕрцыд.  Куыд аивадон, афтӕ документалон кинонывтӕ дзы бирӕ систа.  Уыцы рӕстӕгӕн историктӕ дӕр скодтой аккаг аргъ ӕмӕ йӕ куыд историон ӕрмӕг, афтӕ бахастой Уӕрӕсейы ногдӕр историйы ахуыргӕнӕн чингуытӕм дӕр. Уыцы рӕстӕг киноаивады журналисттӕ  рахуыдтой «Чернуха».

Критик ӕмӕ кинойы аналитик Александр Башкиров йӕ рӕстӕджы фыста: «Ӕз уарзтон криминалон кинонывтӕ. ӕцӕгдӕр, жанрон кинонывӕй хуыздӕр ницы равдисдзӕн рӕстӕг. Уӕд амарӕн уыд алкӕй дӕр алцӕй тыххӕй дӕр, раст революцийы азты ӕмӕ ӕнӕмбӕрст рӕстӕджыты куыд уыд, афтӕ».

Мурат йӕ кинонывтӕ «Фанат», «Курьер Скӕсӕнмӕ»,  «Адӕймаг цъӕх кимоно»-йы куы систа, уӕд ӕрлӕууыд, Башкиров цы кинонывты кой кӕны, уыцы жанры ист кинонывты фыццаг рӕнхъыты. Киноныв «Фанат»-ӕн ныффыста сценари, йӕ режиссер та уыд  Владимир Феоктистов, бирӕ йыл фыстой, ӕвдисынц ӕй ныр дӕр. Мӕнӕ куыд зӕгъы ацы кинонывы тыххӕй Башкиров: «Бӕрӕг сты йӕ удцырыны гуырӕнтӕ — «Тугӕйдзаг спорт» Ньютӕ Арнольды  Жан Клод Ван  Даммимӕ. Ист ӕрцыд 1988 азы. Фӕлӕ проект  «Фанат»-ы киносценарист, куыд удгоймаг, афтӕ  хуымӕтӕг нӕу. Уый ӕнӕрыхъусӕггагӕй  зонгӕ у каратэйы секциимӕ, криминалон дунеимӕ.  Джусойы-фырты каскадер ӕмӕ спортсмены сценари йемыдзаг у цаутӕй. Уыдонӕн та ӕрхъуыды кӕнӕн нӕ уыд, фӕлӕ сӕ райсӕн уыд, нӕ алыварс цы ӕцӕгдзинад ис, ӕрмӕстдӕр уырдыгӕй. Ам сӕйраг ролы архайы Артур Серебряков. Киноныв «Фанат» афтӕ рагондӕр нӕу, зӕгъӕм, «Тугӕйдзаг спорт»-ӕй. Кинонывы ис бирӕ хылтӕ,  ист у бӕлвырд  схемӕмӕ гӕсгӕ:  «иу  ӕмӕ бирӕ ныхмӕлӕуджытӕ». Уыдон та сты  пластикондӕр, Брюс Лийы кинонывтӕй хъауджыдӕр. Фӕлӕ уыдон дӕр  сӕ рӕстӕгӕй фӕраздӕр сты. Афтӕмӕй систы боевикты хореографийы халдих.

Фӕлӕ Алексей Серебряковы тыххӕй зӕгъын хъӕуы  сӕрмагондӕй. Уымӕн ӕмӕ йӕ кинонывмӕ, куыд актер, афтӕ Мурат фидар кодта, режиссер та ӕндӕр актеры бакӕнинаг уыд кинонывы. Фӕлӕ уыцы рӕстӕг «сау ист кинонывтӕ» кӕй хуыдтой, ахӕмтӕ разындысты.  Уыцы рӕстӕджыты ист куыстыты номхыгъды ис Джусойты Мурат ӕмӕ Басаты Алыксандры ист   киноныв «Курьер Скӕсӕнмӕ». Александр Башкиров куыд зӕгъы, афтӕмӕй уый, каст кӕмӕ цӕуы, уыцы ӕппӕты хуыздӕр киноныв у.  Кӕд йӕ рӕстӕджы афтӕ зындгонд нӕ уыд, стӕй ныртӕккӕ дӕр аивадуарзджытӕй  айрох. Фӕлӕ уымӕн дӕр йӕ сценари уыд ахъаззаг.  Уый у эпикон, криминалон киноныв, цаутӕй хъӕздыг ӕцӕг боевик. Йӕ сюжеты сты 90-ӕм азты цаутӕ, нывтӕ. Уыдонӕн та, куыд фӕзӕгъынц, ныхмӕлӕуджытӕ нӕй. Фӕнды мӕ, цӕмӕй йӕм уе ‘ппӕт дӕр бакӕсат, уый тыххӕй уӕлӕмхасӕн ӕрмӕгмӕ ма  ӕркӕсут, афтӕмӕй. ӕмӕ дзы уӕхицӕн базондзыстут, советон ӕмӕ уый фӕстӕ азты ист кинонывты кӕй нӕ федтат, ахӕм ногдзинӕдтӕ.

Ацы киноныв хӕрзхъӕд кӕй у, уый та бамбардзыстут йӕ фыццаг кадртӕй, архайджыты  ныхасы фыццаг рӕнхъытӕй,  сценӕтӕй ӕмӕ музыкӕйӕ.  Кӕд уӕ йӕ хӕрзхъӕддзинад дисы ӕфтауы, уӕд уын ӕй зӕгъӕм, йӕ аивадон разамонӕг кӕй уыд жанрон кинонывты номдзыд режиссер  Станислав Говорухин. Сӕйраг ролы та дзы ахъазыд КӕПИ-ы (ВГИК-ы)  рауагъдон, Сергей Герасимовы ахуыргӕнинаг Беслехъоты Эльбрус.

Ацы кинонывтыл дзургӕйӕ, цӕмӕн ӕрхӕссӕм  Александр Башкировы хъуыдытӕ? Уымӕн ӕмӕ уый ныффыста советон ӕмӕ уый фӕстӕ азты ист уӕрӕсейаг  кинонывтыл (боевиктыл) ӕппӕты ахадгӕдӕр куыстытӕ ӕмӕ уыцы рӕстӕджы киноаивадӕн кӕны ӕппӕты хуыздӕр хатдзӕг.

Мурат, уыцы-иу рӕстӕг фӕсаууонмӕ каст фӕци КӕПИ-йы  (ВГИК-ы) киноиртасӕн-сценарон факультеты сценарон хайад. Уым та ахуыр кодта зындгонд советон сценарист ӕмӕ ахуыргӕнӕг Николай Фигуровскимӕ.

Зӕгъын хъӕуы уый, ӕмӕ Мурат кӕуыл баууӕнда, ахӕм авторитеттӕ  йын нӕй. У критикон зондахастыл хӕст. Ардыгӕй гуыры йӕ ахаст цардмӕ дӕр. Алы авторитетон хъуыдыйӕн дӕр хъуамӕ уа фидар бындур. Фӕлӕ киноаивадыл ӕй чи сахуыр кодта, уыцы адӕймагӕн  абон дӕр кӕны стыр аргъ.

Иуахӕмы мын Муратимӕ  рауад быцӕу ныхас иу кинонывы тыххӕй, ӕмӕ мын афтӕ зӕгъы: «Уӕвгӕ, мӕ ахуыргӕнӕг куыд дзырдта, кӕд кинонывы, кӕмӕн фӕтӕригъӕд кӕнай, ахӕм архайӕг нӕ уа, уӕд уый ӕцӕг киноныв нӕу». Ацы хъуыды у ӕмбӕрстгонд, дзуапп дӕтты литературӕ ӕмӕ аивады ӕнусон хӕсӕн: арф- хъуыдыджын ӕмӕ уӕздан  дзуапп. Уый мах не ‘рхъуыды кодтам. Ам баиу сты ахуыргӕнӕг ӕмӕ ахуырдзауы хъуыдытӕ: алы рӕстӕджыты дӕр хъуамӕ уа ӕмбӕхст сӕр сӕрмӕхӕссынад, адӕймагдзинад ӕмӕ намыс».

Ацы ӕртӕ хорзӕхыл ӕнцой кӕны Джусойты Мураты сфӕлдыстадон фӕндаджы нысан. Ууыл дзурӕг сты йӕ ӕртӕ аивадон кинонывы «Хохаг», «Фарн» ӕмӕ «Ӕрзӕт». Уым нын автор не ‘ргом здахы  адӕмы хъысмӕт философон хуызы бамбарынмӕ, сӕ архайджыты дины уырнынадыл, бӕлвырд  архайджыты драматургион  быцӕудзинӕдты бындурыл.

Киноныв «Ӕрзӕт»-ы цауты уынӕм ирон хӕххон хъӕу  нудӕсӕм ӕнусы ӕртыккаг ӕмбисы. Ам ма бафиппайдзыстӕм, патриархалон цардыуаг куы ӕрлӕмӕгъ, уӕд,  куыд адӕм, афтӕ хи бахъахъхъӕныныл нӕ дзыллӕ куыд архайдтой, уый. Уый та уымӕн афтӕ рауад, ӕмӕ сӕ цардыл фӕзынд, нырма ӕрыгон ӕмӕ ӕнӕмӕнг ӕрцӕуинаг  чи уыд, уыцы уӕрӕсейаг капитализмы дуг. Уый та — фыццаджыдӕр, баст у, царды сӕраппонд иуӕй-иу ӕгъдӕуттыл стырзӕрдӕ суӕвынимӕ. Афтӕмӕй дзы  федтам драматургион ӕмӕ царды ныхмӕлӕуддзинӕдтӕ.

Фӕлӕ уӕддӕр ирон национ киноаивады иуыл ахсджиагдӕр цауыл банымайӕн ис киноныв «Хохаджы» фӕзынд. Уый цыма нӕхи ӕмӕ дунеӕмбарынады сусӕг ӕвӕрӕн у, афтӕ нӕм зыны. Цыма йӕ архайджытӕй алчидӕр нӕ  удварны сыгъдӕг дунейӕн ӕмӕ нӕ фидӕнӕн у дзуапдӕттӕг. Мурат дзы  тынг арӕх пайда кӕны лӕппу-фӕсивӕды архайдӕй. Уый та уымӕн ӕмӕ, кӕд ӕрыгӕттӕ сты, уӕддӕр се ‘мгӕрттау рӕузонд не сты, фӕлӕ сты уӕззау зондыл хӕст. Хатыр кӕнын, ӕхсар,  адӕймагдзинад — уый у  нӕ хъуыдытӕ равдисынӕн ӕппӕты ахъаззагдӕр фӕрӕз. Йӕ кинонывы фӕрцы нын автор ӕвдисы йӕ сагъӕс национ химбарынады, ирон ӕгъдауы ӕмӕ уаджы миниуджытӕ кӕй сафӕм, ууыл.

Киноныв «Хохаджы» кӕрон та цыма нӕ алчидӕр йӕхи ирон химбарынадыл фӕлварӕн ацӕуы, афтӕ зыны. Уый та уӕлдай ахсджиагдӕр у, моралон уагӕвӕрдтӕ сӕфын куы райдыдтой, уыцы рӕстӕджыты.  Мурат ацы кинонывимӕ  архайдта ӕмӕ сси Дунеон ӕмӕ ӕппӕтуӕрӕсеон кинофестивалты уӕлахиздзау. Иумӕйагӕй дзы  равдыста  ирон адӕмы дунеӕмбарынад.

Аивадон киноныв (цыбырметражон) «Къоста»  у, кинорежиссер фӕстагдӕр цы аивадон куыст сарӕзта, уый. Джусойты Мурат документалон кинонывтӕ исынмӕ бавнӕлдта, йӕ ном аивадон кинонывты фӕрцы адӕмыл куы айхъуыст, уӕд. Уый уыд ивгъуыд ӕнусы 90-ӕм азты райдайӕны. Ахӕм кинонывтӕ исыны фӕлтӕрддзинад ӕм фӕзынд, Цӕгат Кавказы кинохроникӕйы студийы кӕй бакуыста, уый руаджы. Ацы кинонывты йӕ архайджытӕ уыдысты, национ тыгъдады сӕ зондахаст рӕстӕджы уӕзӕй ивгӕ кӕмӕн цыдысты, уыдон. Уыцы кинонывты фӕрцы, Мурат  Цӕгат Кавказы киностудийы цы фӕлтӕрддзинад райста, канд уый нӕ равдыста, фӕлӕ ма дзы федтам,  ирон ӕмӕ кавказаг адӕмы миддуне йын хорз зонгӕ кӕй у, уый.

Уыцы азты, Мураты ист хуыздӕр документалон кинонывтӕ сты: «Чи?» (Цӕцӕн ӕмӕ Мӕхъӕл), «Цовкра» (Дагестан), киноальманахтӕ  «ӕмӕ ӕрцӕудзысты урсхил  адӕм» ӕмӕ «Цӕсгӕмттӕ».

Ныртӕккӕ кӕд Мурат кинонывтӕ нӕ исы, фыссы киносценаритӕ, ӕххуыс кӕны, хи фӕндаг ссарынӕн йӕ цард киноаивадимӕ баиу кӕнынмӕ чи хъавы, уыцы фӕсивӕдӕн. Вӕййы кинофестивалты жюриты уӕнг, уым зонгӕ кӕны киноаивады дӕснытӕй бирӕтимӕ, семӕ саразы ӕмӕ дары фидар бастдзинӕдтӕ. Иудадзыг фӕкӕсы  кинонывтӕм ӕмӕ йе ‘мбал кинорежиссерты ист ног аивадон куыстытӕм. Бирӕ рӕстӕг ын ис йӕ бинонтимӕ ныхасӕн дӕр.  ӕмӕ уый дӕр амонд у. Уымӕн ӕмӕ йӕ зонын, Мурат цардыл тохгӕнӕг кӕй у. ӕмӕ та йын йе ‘нӕниздзинад фадат куыддӕр радта, афтӕ та нын нӕ зӕрдӕтӕ йӕ ног куыстытӕй кӕй барухс кӕндзӕн, ууыл дызӕрдыг нӕ кӕнын.

Чъерджиаты Индирӕ,

киноиртасӕг, УФ-йы Кинематографистты цӕдисы уӕнг

ОСТАВЬТЕ ОТВЕТ

Please enter your comment!
Please enter your name here