Иры зӕххыл цӕрдзӕнис йӕ ном

0
60

Ирон литературӕмӕ йӕ ахадгӕ ӕвӕрӕнӕй адӕмы ‘хсӕн йӕхицӕн ном чи скодта, уыцы дзырдаивады дӕснытӕй иу у зындгонд поэт, драматург, публицист, нывгӕнӕг,   РЦИ-Аланийы культурӕйы сгуыхт кусӕг, цӕстуарзон, хӕларзӕрдӕ адӕймаг Чеджемты Геор. Ацы аз, йӕ райгуырдыл 80 азы кӕй сӕххӕст, уый фӕдыл Фысджыты цӕдисы уыд йӕ номарӕн фембӕлд.

Георы цард ӕмӕ сфӕлдыстадон фӕндагыл афӕлгӕсыд Фысджыты цӕдисы сӕрдар, Хетӕгкаты Къостайы номыл паддзахадон премийы лауреат Агънаты Гӕстӕн ӕмӕ ныхасы бар радта рауагъдад «Ир»-ы редактор Дзуццаты Зӕлинӕйӕн.

— Кӕд Геор рауагъдад «Ир»-ы 15 азы йеддӕмӕ нӕ фӕкуыста, уӕддӕр йе сфӕлдыстадон азфысты ныууагъта зынгӕ фӕд. Йӕ  рӕстӕджы ӕнтыстджынӕй каст фӕци Мӕскуыйы полиграфион институт, сахуыр дзы кодта нывгӕнӕг-графикы дӕсныйадыл. Ацы хъуыддаджы тынг дӕсны кӕй уыд, уый уайтагъд фӕбӕрӕг рауагъдады чингуытыл. Йе ‘рмдзӕф, иннӕ нывгӕнджытӕй ӕмӕ аивадон редакторты ӕрмдзӕфӕй  уӕлдай тынгдӕр бӕрӕг кодта. Хъыг макӕмӕ фӕкӕсӕд, фӕлӕ-иу Георы нывтӕй аивгонд чингуытӕй цыд цыдӕр ӕнахуыр диссаджы хъарм. Уыцы хуызы ма йе ‘рмдзӕф бӕрӕг дардта сывӕллӕтты журнал «Ногдзау»-ыл дӕр. Цӕмӕй ацы мыхуыры фӕрӕз ногӕй цӕуын райдайа ӕмӕ нӕ кӕстӕрты удварны хъомыладыл хорзӕй зына, ууыл тынг чи бацархайдта, уыцы арфӕйаг адӕймӕгтӕй иу уыд Геор. Йӕ уды уӕздандзинады, ӕфсармы миниуджыты аккаг бынат кӕй ахстой, литературӕйы, нывгӕнынады, ӕвзагзонынады, фольклористикӕйы йӕ зонындзинӕдтӕ арф ӕмӕ бирӕвӕрсыг кӕй уыдысты, уый рабӕрӕг йӕ чингуыты «Арвы бӕлӕстӕ», «Фыдӕлты хӕзна» ӕмӕ «Цола»-йы.  Куыд ӕй зонут, афтӕмӕй, — дзырдта дарддӕр Зӕлинӕ, Георӕн ӕрӕджы рауагътам йӕ критикон уацты цымыдисаг чиныг «Фыдӕлты хӕзна», рауадзынмӕ цӕттӕ у, сывӕллӕттӕн цы уацмыстӕ ныффыста, уыдоны иумӕйаг ӕмбырдгонд дӕр, — загъта Зӕлинӕ.

Геор ирон литературӕмӕ цы ног жанртӕ бахаста, йӕ драматургион сфӕлдыстадӕй нӕ театралон аивад зынгӕ кӕй фӕхъӕздыгдӕр, уый тыххӕй та ӕмбырды йӕ хъуыдытӕ загъта  газет «Рӕстдзинад»-ы сӕйраг редактор, филологон наукӕты кандидат Хозиты Барис.

Зындгонд фыссӕг, Хетӕгкаты Къостайы номыл паддзахадон премийы лауреат Цомартаты Изӕтбег та фембӕлды радзырдта йӕ мысинӕгтӕ Георӕн йе ‘мдзӕвгӕты чиныг «Арвы бӕлӕстӕ» мыхуырмӕ куыд цӕттӕ кодта, стӕй йӕ нывгӕнӕджы курдиаты фӕрцы  журнал «Ногдзау»-ыл куы зӕрдиагӕй куыста ӕмӕ дзы йӕ конд нывты ӕмӕ ӕмдзӕвгӕты фӕрцы сабитӕн циндзинад кӕй хаста, уый тыххӕй.

— Геор уыди уӕздан ӕмӕ фырнымд адӕймаг, йӕ зӕрдӕйы ӕмӕ уды арфы хаста ӕцӕг поэты, нывгӕнӕджы ӕнкъарӕнтӕй нывӕзт рӕстаг  дуне. Фидарӕй афтӕ зӕгъӕн ис, ӕмӕ Геор йӕ поэтикон курдиатӕй айгӕрста йӕхи сӕрмагонд фӕндаг ирон дзырдаивады, —дзырдта  зындгонд поэт ӕмӕ журналист, РЦИ-Аланийы культурӕйы сгуыхт кусӕг Къадзаты Станислав.

Чеджемы-фырты сфӕлдыстад астӕуккаг скъолаты ахуырдзаутӕн ӕмӕ ахуыргӕнджытӕн цас уарзон у, куыд зӕрдиагӕй йӕ ахуыр кӕнынц, уый тыххӕй  бӕлвырд ӕмӕ мидисджын ныхас ракодтой Дзӕуджыхъӕуы 5-ӕм гимназы ӕмӕ 27-ӕм астӕуккаг скъолайы  ирон ӕвзаг ӕмӕ литературӕйы ахуыргӕнджытӕ — Уӕлыгӕсты Мӕдинӕ ӕмӕ Къораты Жаннӕ.

Уыдонӕй уӕлдай ма номарӕн ӕмбырды Георы бирӕвӕрсыг сфӕлдыстады ӕмӕ ирд курдиаты тыххӕй йӕ хъуыдытӕ загъта Ирон академион театры литературон хайы сӕргълӕууӕг, журнал «Мах дуджы» сӕйраг редактор Хетӕгкаты Оксанӕ.

Ӕмбырды рӕстӕг ма Фысджыты цӕдисы сӕрдар Агънаты Гӕстӕн, РЦИ-Аланийы Сӕргълӕууӕг Битарты Вячеславы арфӕйы фыстӕг радта УФ-йы Фысджыты цӕдисы уӕнг Баситы Зӕлинӕйӕн,  йе сфӕлдыстадон курдиатӕй  нӕ республикӕйы цӕрджыты ӕфсӕддон патриотон хъомыладыл кӕй ауды, уый тыххӕй.

Гасанты Валери

ОСТАВЬТЕ ОТВЕТ

Please enter your comment!
Please enter your name here