Национ проекттӕ: ахадгӕ архайды мадзӕлттӕ

0
23

Фыццаградон национ проекттӕ ӕххӕст кӕныныл Цӕгат Ирыстоны куыст куыд цӕуы? Ацы ӕмӕ иннӕ ахсджиаг фарстытыл ӕрдзырдтой, РЦИ-Аланийы Хицауады Сӕрдар Тускъаты Таймураз ӕмӕ Цӕгат Кавказы федералон зылды Уӕрӕсейы Президенты ӕххӕстбарджын минӕвары хӕдивӕг Максим Владимировы разамындӕй Дзӕуджыхъӕуы цы ӕмбырд уыд, уый архайджытӕ.

Зындгонд куыд у, афтӕмӕй республикӕ ацы аз дӕр ӕххӕст кӕны фыццаградон национ проекттӕ «Демографи», «Ӕнӕниздзинад хъахъхъӕнынад», «Ахуырад», «Экологи», «Ӕдас ӕмӕ хӕрзхъӕд автомобилон фӕндӕгтӕ», «Нымӕцон экономикӕ», «Культурӕ» ӕмӕ иннӕты фӕлгӕты.

Уымӕй уӕлдай, сӕрмагонд регионалон проектты уагӕвӕрдмӕ гӕсгӕ, 2020 азы республикӕйы арӕзт ӕмӕ бындурон цалцӕггонд цӕуынц алыхуызон ахсджиаг 130 объекты (уыдоны арӕзтад ӕмӕ цалцӕгӕн нысангонд цӕуы 6 миллиард сомӕй фылдӕр).

Афтӕ, республикӕйы Хицауады Сӕрдары хӕдивӕг Иринӕ Азимова бӕстон радзырдта, национ проект «Ахуырад»-ы фӕлгӕты ныридӕгӕн цы куыст бакодтой, стӕй хӕстӕгдӕр рӕстӕг цавӕр проекттыл архайдзысты, уыдӕтты тыххӕй. Йӕ ныхасмӕ гӕсгӕ, зӕгъӕм, ныртӕккӕ республикӕйы арӕзт цӕуынц 5 иумӕйагахуырадон скъолайы Дзӕуджыхъӕуы, стӕй Мӕздӕджы, Горӕтгӕрон ӕмӕ Рахизфарсы районты. Дарддӕр ӕххӕстгонд цӕуы иумӕйагахуырадон кусӕндӕтты спортивон залты цалцӕг, уыимӕ, сӕрмагонд ӕргом здахынц хъӕууон скъолаты уавӕрмӕ. Цалцӕггӕнӕн куыстытӕй уӕлдай, архайд цӕуы уыцы спортивон залтӕ ӕмӕ секциты материалон-техникон ифтонгдзинад фӕнывылдӕр кӕныныл.

Иринӕ Азимова куыд фӕнысан кодта, афтӕмӕй уыцы ӕмӕ иннӕ ӕппӕт объекттыл дӕр куыстытӕ цӕуынц сӕрмагонд пъланмӕ гӕсгӕ.

Иннӕ ахсджиаг проект у «Ӕнӕниздзинад хъахъхъӕнынад». Уый фӕлгӕты республикӕйы арӕзт цӕуынц 36 фелсырон ӕмӕ фелсырон-акушерон пункты. Аразджытӕ дарддӕр кусынц Сывӕллӕтты республикон клиникон рынчындоны соматикон хайады цалцӕг ӕмӕ ног поликлиникӕйы арӕзтадыл. Ацы ӕмӕ иннӕ медицинон кусӕндӕтты арӕзтад ӕмӕ цалцӕджы мадзӕлттимӕ иурӕстӕг лыггонд цӕуынц сӕ техникон ифтонгдзинады фарстытӕ дӕр.

Фыццаградон национ проект «Культурӕ»-йыл республикӕ куыд кусы, уый тыххӕй та бӕстон радзырдта культурӕйы министр Къубалты Эльбрус. Министры ныхасмӕ гӕсгӕ, проекты фӕлгӕты ӕппӕт нысангонд куыстытӕ дӕр ӕххӕстгонд цӕуынц афойнадыл. Проекты мадзӕлттыл архайгӕйӕ, сӕрмагонд ӕргом здӕхт цӕуы, муниципалон скондты цы клубтӕ ӕмӕ культурон-фӕлладуадзӕн центртӕ ис, уыдоны нывылдзинадмӕ. Афтӕ, 2020 азы бындурон цалцӕггонд ӕрцӕудзысты культурӕйы 7 хӕдзары, 6 ахуырадон кусӕндонӕн та балхӕндзысты хъӕугӕ музыкалон инструменттӕ ӕмӕ ӕндӕр техникон ифтонггӕрзтӕ. Уый фӕрцы, кӕй зӕгъын ӕй хъӕуы, зынгӕ фӕхуыздӕр уыдзӕн аивадон ахуырады ӕмвӕзад, стӕй фӕфылдӕр уыдзӕн культурӕйы къабазы ахуырадон бынӕтты нымӕц дӕр. Министр йӕ раныхасы сӕрмагондӕй фӕбӕрӕг кодта, ӕвзонг аивадуарзджыты паддзахадон театр «Саби» дӕр бындурон цалцӕггонд кӕй цӕуы, уый.

Афтӕ бӕстон иннӕ профилон ведомствӕтӕ ӕмӕ цӕстдарӕг оргӕнты минӕвӕрттӕ радзырдтой, иннӕ федералон ӕмӕ регионалон проектты фӕлгӕты цы мадзӕлттӕ ӕххӕстгонд цӕуы, уыдоны тыххӕй.

Ӕмбырдӕн хатдзӕгтӕ кӕнгӕйӕ, Тускъаты Таймураз куыд фӕнысан кодта, афтӕмӕй проектты мадзӕлттӕ афойнадыл ӕххӕст кӕныныл бӕрнон сты сӕ куратортӕ — уыдоны комкоммӕ цӕстдард хъуамӕ уа арӕзтад ӕмӕ цалцӕджы графиктӕм, дихгонд фӕрӕзтӕ афойнадыл ӕмӕ сӕ нысаныл хардз кӕнын ӕмӕ иннӕ ӕппӕт фарстытӕм.

Фыццаградон национ проекттӕ ӕххӕст кӕныныл республикӕ куыд кусы, уый хорзыл банымайгӕйӕ, Максим Владимиров куыд загъта, афтӕмӕй ацы проекттӕ ӕмӕ программӕтӕ ӕххӕст кӕнынмӕ федералон Хицауады ‘рдыгӕй уыдзӕн иудадзыг лӕмбынӕг цӕстдард. «УФ-йы Президенты уынаффӕйӕ цы фыццаградон национ проекттӕ ӕмӕ федералон программӕтӕ бацӕттӕ кодтам, уыдоны сӕйрагдӕр нысан у не ‘мбӕстӕгты царды ӕмвӕзад зынгӕ фӕхуыздӕр кӕнын, уӕрӕсейӕгты ӕдасдзинад ӕмӕ цардархайдӕн уӕлӕмхасӕн фӕрныг фадӕттӕ саразын», — бафиппайдта Президенты ӕххӕстбарджын минӕвары хӕдивӕг.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here